नवविवाहित युवक आत्तिँदै एचआइभी परीक्षण गराउन पुगे

‘एक नव विवाहित युवक आत्तिँदै एचआइभी परीक्षण गर्नु पर्‍यो भन्दै आए । किन ? भनेको त–भर्खरै विवाह गरेको त बल्ल थाहा पाएँ उ त एचआइभी संक्रमित पो रहेछ भन्यो । सायद यस्तै प्रकृतिको घटना (या नव श्रीमान वा नव श्रीमती, कोही पनि) हाम्रो समाजमा थुप्रै घटना घटिरहेको होला । समाधान ??’

यो वरिष्ठ सरुवा रोग विशेषज्ञ डा. शेरबहादुर पुनले बिहीबार बिहान सामाजिक सञ्जालमा पोस्ट गरेको कुरा हो ।

टेकु अस्पतालमा बुधबार दिउँसो २५–२६ वर्षका युवा आत्तिँदै आएको घटनापछि खुलेको रहस्यको कुरा डा. पुनले आफ्नो स्टाटसमा लेखेका हुन् । हालै बिहे गरेका युवा आत्तिँदै आएर एचआइभी परीक्षण गराउनु पर्‍यो भनेपछि सोधखोज गर्दा घटनाबारे थाहा भएको डा. पुनले बताए ।

डा. पुनले देश सञ्चारसँग भने, ‘घटना बुधबार दिउँसोको हो । ती युवा आए । परीक्षणका लागि आग्रह गरे । हामीले प्रक्रिया पूरा गर्नका लागि जानकारी लिँदा उनी नवविवाहित रहेको थाहा भयो । आफ्नी श्रीमतीले बिहेपछि मात्रै एचआइभी संक्रमित रहेको बताएकाले आफू परीक्षणका लागि आएको बताए ।’

डा. पुन भन्छन्, ‘यो घटना त प्रतिनिधि मात्रै हो । यस्ता धेरै केसहरु हुन सक्छन् । कतै केटी कतै केटा संक्रमित भएका हुन सक्छन् । अनि विवाह पूर्व जाँच नगरेको वा थाहा भएर पनि नखुलाइएको पनि हुन सक्छ । यसले समस्या थप जटिल बनाउँछ ।’

एचआइभी प्रतिको मानसिकताकै कारण यस्ता घटना हुने गरेको र यसले गर्दा एचआइभीविरुद्धको अभियानमा समस्या खडा हुने गरेको डा. पुनले बताए ।


एचआइभी भन्ने बित्तिकै असुरक्षित यौन सम्पर्क वा चरित्रसँग जोडिने भएकाले संक्रमित व्यक्तिहरु खुल्न सक्ने अवस्था नरहेको मानसिकतामा परिवर्तन गरिनु पर्ने डा. पुनसहित एचआइभीविरुद्धको अभियानमा लागेकाहरुले बताएका छन् ।

एचआइभी सर्ने विभिन्न कारण मध्ये संक्रमित व्यक्तिसँगको असुरक्षित यौन सम्पर्क एक कारण रहेको बुझाउनु पर्ने र एचआइभी सर्नुका अरु कारण पनि छन् भन्ने सबैमा थाहा हुने वातावरणका लागि काम गर्नु पर्ने डा. पुनले बताए ।

निर्मलीकरण नगरिएको सुई, रगतबाट संक्रम हुने सम्भावना रहन्छ । एचआइभीलाई व्यक्तिको चरित्रसँग जोडेर हेर्ने मानसिकतामा परिवर्तन नभएसम्म यस्तो समस्या रहिरहने र संक्रमण भित्रभित्र फैलिँदै जाने जोखिम रहेको डा. पुनले बताएका छन् ।

‘बुधबारको घटनामा आत्तिँदै आएका युवाले ‘मलाई त फँसाइयो’ भनेका थिए’, डा.पुनले भने, ‘यस्तो घटनाले त पारिवारिक तथा सामाजिक सम्बन्धमा पनि असर पर्ने देखियो । अब मानसिकतामा परिवर्तन नगरी हुँदैन ।’

माघ २४, २०७५ मा प्रकाशित
प्रतिक्रिया दिनुहोस्