हेलिकोप्टर दुर्घटनामा ज्यान गुमाएका चार जनाको पशुपति आर्यघाटमा दाहसंस्कार (फोटोफिचर)

तस्बिर: सुलभ श्रेष्ठ/देश सञ्चार

काठमाडौँ– ताप्लेजुङमा बुधबार भएको हेलिकोप्टर दुर्घटनामा ज्यान गुमाएका चार जनाको पशुपति आर्यघाटमा दाहसंस्कार गरिएको छ। शुक्रबार दिउँसो उनीहरुको आ–आफ्नो विधि र परम्परा अनुसार दाहसंस्कार गरिएको हो।

नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकोप्टरका क्याप्टेन प्रभाकर केसी र संस्कृति, पर्यटन तथा नागरिक उड्डयनमन्त्री रवीन्द्र अधिकारीका सुरक्षाकर्मी अर्जुनकुमार घिमिरेको शुक्रबार दिउँसो आर्यघाटमा दाहसंस्कार गरिएको हो।

दुर्घटनामा दिवङ्गत पर्यटनमन्त्री रवीन्द्र अधिकारीको शव अन्तिम संस्कारका लागि गृहजिल्ला कास्की लगिएको छ। यति एयरलाइन्सका प्रबन्ध निर्देशक आङछिरिङ शेर्पाको भने आइतबार बौद्ध विधिअनुसार टेकु घाटमा अन्त्यष्टि गरिने परिवारले जनाएको छ।

श्रद्धाञ्जलि अर्पण गर्न नेपाल सरकारका मुख्य सचिव लोकदर्शन रेग्मी, प्रधानमन्त्री केपी शर्मा ओलीका प्रेस सल्लाहकार डा। कुन्दन अर्याल, सरकारको विशिष्ट श्रेणीका पदाधिकारी, निजामती कर्मचारी, नेपाल नागरिक उड्डयन प्राधिकरणका कर्मचारी, नेपाली सेनाका अधिकारी तथा सर्वसाधारणको आर्यघाटमा ठूलो भीड लागेको थियो।

यसअघि बिहान दिवङ्गत सातै जनाको शव काठमाडौँको टुँडिखेलमा श्रद्धाञ्जलिका लागि राखिएको थियो। श्रद्धाञ्जलि दिन मृतकका परिवार, आफन्तजन, शुभेच्छुक, विभिन्न दलका नेता उच्च पदस्थ सरकारी अधिकारी सहभागी भएका थिए।काठमाडौँबाट तेह्रथुमको चुहानडाँडामा विमानस्थलको सम्भाव्यता अध्ययनका लागि पुगेको मन्त्री रवीन्द्र अधिकारीसहितको सातजनाको टोली कार्यक्रम सकेर पाथीभरा हुँदै काठमाडौँ फर्किने क्रममा ताप्लेजुङको तारेभिरमा हेलिकप्टर दुर्घटनामा परेको थियो।  

तस्बिरहरुः सुलभ श्रेष्ठ/देश सञ्चार।

फाल्गुन १७, २०७५ मा प्रकाशित
प्रतिक्रिया दिनुहोस्