पासवर्ड कति सुरक्षित ?

तपाईँको पासवर्ड यी त होइनन् ?

तपाईँको सामाजिक सञ्जाल तथा इमेल एकाउन्टको पासवर्ड ‘१२३४५६’ हो भने परिवर्तन गर्ने बेला भयो ।

पछिल्लो पटक गरिएको अनुसन्धानमा यो पासवर्ड इन्टरनेटमा सबैभन्दा जोखिमयुक्त पासवर्डको रुपमा देखिएको हो । यस्तो पासवर्ड भएका एकाउन्ट ह्याक हुने सम्भावना उच्च रहेको अनुसन्धानकर्ताले बताएका छन् ।

यस्तै नाम, खेल टिम तथा कसम जताउने शब्दहरु पासवर्डका रुपमा प्रयोग गरिएको भए ती पनि जोखिममा छन् । बेलायतको नेशनल साइबर सेक्युरिटी सेन्टर (एनएससी) गरेको अध्ययनमा यस्ता पासवर्ड रहेका विश्वभरका इन्टरनेट प्रयोगकर्ताको एकाउन्ट जोखिममा रहेको पाइएको हो ।

विश्वभर ‘१२३४५६’ आफ्नो एकाउन्टको पासवर्डको रुपमा प्रयोग गर्नेको संख्या २३.२ मिलियन भन्दा बढि रहेको पाइएको छ, जुन ह्याक गर्न सजिलो हुन्छ । यस्तै ‘१२३४५६७८९’ लाई पासवर्डका रुपमा ७.७ मिलियनले प्रयोग गरेका छन् ।

यस्तै ‘क्वेर्टी’ र ‘पासवर्ड’ लाई पासवर्डका रुपमा प्रयोग गर्नेको संख्या ३० लाख भन्दा बढि छ ।

बेलायतमा गरिएको अध्ययन अनुसार बढि प्रयोग हुने पासवर्डको सूचिमा पाँचौँ नम्बरमा ‘११११११’, छैटौँमा ‘१२३४५६७८’ सातौँमा ‘एबिसी१२३’, आठौँमा ‘१२३४५६७’, नवौँमा ‘पासवर्ड१’ र दशौँमा ‘१२३४५’ रहेका छन् ।

यस्तै ‘आइलभयु’, ‘मङ्की’, ‘ड्रयागन’ सहितका पासवर्डहरु पनि बढि प्रयोग हुनेमा परेका छन् । आफूले सम्झिन सकिने तर ‘र्‍याण्डम’ अंक वा अक्षरसहितको पासवर्ड प्रयोग गर्न सुझाव दिइएको छ ।

बैशाख १४, २०७६ मा प्रकाशित
प्रतिक्रिया दिनुहोस्