आमा, म तिमीलाई सम्झन्छु!

तिमी भन्थ्यौ- म सुन्थेँ, मेरो बाल्यकालको कथा

मलाई खुसी मात्र दिएछौ, आफूले लिएछौ व्यथैव्यथा

विज्ञापन

मेरा खुसीहरुका लागि, तिम्रो कत्रो त्याग छ

मेरा हर पाइलामा, तिम्रो ठूलो साथ छ।

 

म पहिलोपटक टक्क उभिँदा, तिमी पो दरिली भएथ्यौ रे

मैले बामे सर्दै गर्दा, तिमी आफू नै संसार घुमेको कल्पना गर्थ्यौ रे

मेरो तोते बोलीमै, तिमी विख्यात प्रवचनहरु सुन्थ्यौ रे

जब म तिम्रो हात समाई हिँड्ने भएँ, मलाई घण्टाघर, चिडियाखाना, धरहरा घुमायौ रे।

 

मलाइ ज्यादै रहर छ आमा,

तिमीलाई डोर्‍याउँदै ग्रेटवाल, आइफिल टावर, बोन्डी बिच घुमाउने

मुजा परेका तिम्रा गाला, तिम्रै निर्दोष खुसीहरुले तनक्क तन्काउने।

 

तिमीलाई सम्झन्छु आमा,

बतास चल्दा म तिमीलाई सम्झन्छु, सिरेटोले तिम्लाई नछोओस् भनी

घाम लाग्दा म तिमीलाई सम्झन्छु, न्यानोमा तिमी आनन्दित भयौ भनी

झरी पर्दा म तिमीलाई सम्झन्छु, तिम्रा पछ्यौरी नरुझून् भनी

बादल लाग्दा म तिमीलाई सम्झन्छु,  तिम्रा खुसी नफाटून् भनी।

 

म खुसी हुँदा तिमी धपक्क बल्छ्यौ

म दुःखी हुँदा मलाई ढाडस नै दिन्छ्यौ

आमा,

म खुसी हुँदा तिमीलाई सम्झन्छु

म दुःखी हुँदा तिमीलाइ सम्झन्छु!

बैशाख २१, २०७६ मा प्रकाशित
प्रतिक्रिया दिनुहोस्