रुपन्देही लन टेनिस संघमा विवाद, तोकिएको अधिवेशन समेत स्थगित

बुटवल– रुपन्देही लन टेनिस संघमा विवाद सिर्जना भएको छ। चार वर्षअघि तदर्थ समिति गठन भएको संघको विधान अनुसार तीन–तीन वर्षमा अधिवेशन गर्नुपर्ने हो। तर अधिवेशन आह्वान भए पनि विवादले रोकिएको छ।

संघका अधिकांश सदस्यले अधिवेशन आह्वान गर्न बारम्बार आग्रह गरेपछि अध्यक्ष आशोक गुरुङले अधिवेशन आह्वान गरेका थिए। १५ सदस्य मध्ये पदाधिकारी सहित १२ जनाले अधिवेशन गर्न माग गरेका थिए।

वैशाख १६ अधिवेशन आह्वान भए पनि हिसाब मिलान र सदस्यता विवादले स्थगित भएको छ। अध्यक्ष गुरुङ आफू अल्पमतमा परेपछि लन टेनिस कोर्ट आसपासका स्थानीयलाई सदस्यता दिने पक्षमा थिए। तर अधिवेशनकै दिन सदस्यता विस्तार गर्न नहुने भन्दै अन्य सदस्यले आपत्ति जनाएपछि अधिवेशन स्थगित भएको हो।

अधिवेशनको माग गर्दै उपाध्यक्ष मनोजकुमार बस्नेत, सचिव गोपाल ज्ञवाली, कोषाध्यक्ष अर्जुन गुरुङ, सदस्यहरु अब्दुल सहमद मियाँ, रामबहादुर विक, सञ्जयप्रकाश श्रेष्ठ, अनिल सेञ्चुरी, शेषमणि चौधरी, भिष्म काउचा, सविता विक, सबर मियाँ र सल्लाहकार दीर्घबहादुर केसीले चैत महिनामा खेलकुद विकास समिति रुपन्देही र नेपाल टेनिस संघमा निवेदन दिएका थिए।

निवेदन दिएपछि चैत २३ मा अधिवेशन मिति तोकिएको थियो । सो मितिमा अधिवेशन हुन नसकेपछि केन्द्रको आग्रहमा वैशाख १६ गते अधिवेशन आह्वान भएको हो। अधिवेशनका लागि टेनिस संघले खेलकुद विकास समितिलाई प्रतिनिधिका रुपमा पठाएको थियो।
अधिवेशनको उद्घाटन–सत्र चलिरहेका बेला अध्यक्ष गुरुङले सदस्यता विस्तार र कोर्ट निर्माणको रकम दिनुपर्ने माग गरेपछि विवाद शुरु भएको हो।

आठौँ राष्ट्रिय खेलकुदका लागि देविनगरमा दुई वटा कोर्ट निर्माणका लागि ७० लाख बजेट विनियोजन भएको थियो। अध्यक्ष गुरुङले कोर्ट निर्माणमा आफ्नो व्यक्तिगत रकम खर्च भएको भन्दै करिव १५ लाख संघले जिम्मा लिनुपर्ने बताएका थिए। ‘उपभोक्ता समितिबाट काम गराउँदा बढी रकम खर्च भएको छ, सो रकम संघले जिम्मा लिनुपर्छ’, उनले भने ।

संघका बहुमत सदस्यहरुले सदस्यता विस्तारका लागि पूर्वसूचना हुनुपर्ने बताएका छन्। गुरुङले भने कोर्ट निर्माणमा स्थानीय क्लवहरुको सहयोग रहेकाले उनीहरुलाई समेत सदस्यता दिनुपर्ने बताए। ‘संघ तदर्थ समितिबाट चलेको हो। अधिवेशन गर्ने ख्याल नै नहुँदा ढिलाई भयाे’, उनले भने ।

रुपन्देही खेलकुद विकास समितिका अध्यक्ष योग गुरुङले आन्तरिक समस्याले अधिवेशन रोकिएको भन्दै समस्या समाधान गरिने बताए। ‘आन्तरिक समस्याले अधिवेशन रोकिएको हो, छलफल भइराखेको छ। समस्या समाधान हुन्छ’, उनले भने ।

संघका पदाधिकारी र सदस्यहरुले कोर्ट बनाउन खर्च भएको भनिएको रकमको जिम्मा लिन नसकिने बताएका छन्। कार्यसमिति सदस्य शेषनारायण चौधरीले अध्यक्ष एक्लैले काम गरेकाले त्यसको जिम्मा नसकिने बताए। ‘पहिला हामीलाई जानकारी नै दिनुभएन। अहिले एक करोडजति खर्च भएको छ भनेर हिसाव देखाउनुभएको छ’, उनले भने, ‘यसको जिम्मा लिन सकिदैन।’

अध्यक्ष गुरुङले हिसाबकिताब फाइनल नहुँदासम्म अधिवेशन हुन नसक्ने बताएका छन्। ‘कोर्ट निर्माणको हिसाब मिलान गरेपछि अधिवेशन गर्छाैँ’, उनले भने ।

समयमा अधिवेशन नभएपछि विकास हुँदै गरेको लन टेनिसमा निराशा छाएको छ। खेलाडीहरुले संघलाई बलियो बनाउनका लागि विवाद अन्त्य गरी अधिवेशन गर्नुपर्ने माग गरेका छन्।

बैशाख २८, २०७६ मा प्रकाशित
प्रतिक्रिया दिनुहोस्