गण्डकी प्रदेशका जनताको गुनासो

मुख्यमन्त्री ज्यू, ‘महानगरमा बसेर बस चढ्न पाइएन !’

‘हेलो मुख्यमन्त्री कक्ष’मा मुख्यमन्त्री पृथ्वीसुब्बा गुरुङ गुनासो सुन्दै।तस्बिरः ईश्‍वर देवकोटा/देश सञ्‍चार

पोखरा-हरेक महिनाको एकपटक ‘हेलो मुख्यमन्त्री कक्ष’मा स्वयं उपस्थित भएर गुनासो सुन्ने गरेका गण्डकी प्रदेशका मुख्यमन्त्री पृथ्वीसुब्बा गुरुङलाई मंगलबार पोखरा २२ निवासी भुवानी बरालले भने, ‘मुख्यमन्त्री ज्यू, महानगरबासी त भइयो तर बस चढ्न पाइएन।’

बरालले आफू पुम्दीबासी भएको र उक्त क्षेत्र महानगरमा समावेश भइसक्दा पनि सोचेजस्तो सुविधा उपभोग गर्न नपाएकोमा दुखेसो पोखे।

उनले भने, ‘स्याङ्जा, बुटवल जाने बस सिद्धार्थराजमार्ग हुँदै यहीँ गाउँमुनिको बाटो हुइकिन्छन् ।तर हामीलाई बजारफेर जानुपर्दा एउटो बस काम लाउँदैनन् ।’ उपमहानगरपालिका छँदैताका गाउँमा निरन्तर बस आइरहेको भएपनि आजकल नियमित बस गाउँ नउक्लने गरेकोमा उनको गुनासो थियो।

मुख्यमन्त्री गुरुङले त्यहाँ बस जाने व्यवस्था मिलाउन सम्बन्धित मन्त्रालयमा र यातायात व्यवसायीको ध्यानाकर्षण गराउने बताए।जनताको गुनासो सुझाव सुन्नकै लागि ‘हेलो मुख्यमन्त्री’ कार्यक्रम ल्याइएको सुनाउँदै गुनासोकर्तालाई उनले फोन सम्पर्ककै क्रममा धन्यवाद दिए।

बराल सहित मंगलबार ८ जनाले मुख्यमन्त्रीलाई विभिन्न विषयका गुनासो दर्ता गराए।पोखरा २२, पुम्दीबाट नै एक घन्टाको अवधिमा अन्य ३ जनाले वडाको शान्ति सुरक्षाका लागि प्रहरी चौकी स्थापना गरिदिनुपर्ने माग गरे।

पहिलो सम्पर्कमै सुनिएका लोकराज बरालले पोखराबाट भित्र पनि भएका क्षेत्रमा घरेलु हिंसा सहितका अन्य जघन्य अपराधमा संलग्न व्यक्ति लुक्नका लागि समेत आउने खतरा बढेकाले चासो दिन आग्रह गरे।

बजार क्षेत्रमा प्रहरीहरुको उपस्थिती भइरहने र अपराधिक मनस्थिती भएका मानिसहरु गाउँगाउँतिर सुरक्षित महसुस गर्ने हुँदा त्यस्तालाई निस्तेज गर्न प्रहरी चौकी स्थापना जरुरी भइसकेको बताए।

मुख्यमन्त्री गुरुङले अस्थायी प्रहरी बिट भएपनि तत्कालका लागि स्थापना गर्न सकिने विकल्प सुनाए।उनले गाउँतिर पनि शान्ति सुरक्षा सहरबजार जत्तिकै आश्यक भएको भन्दै गुनासो सम्बोधनका लागि सम्बन्धीत निकायमा जानकारी गराउने प्रतिबद्धता जनाए।

नवलपुर, गैँडाकोटदेखि सम्पर्कमा सुनिएका विप्लव सुवेदीले त्यहाँ भएको यातायात व्यवस्था कार्यालयबाट सवारी चालक अनुमति पत्र वितरण व्यवस्था मिलाउन अनुरोध गरे।

बाक्लो आवादी भएको क्षेत्रमा कार्यालयबाट सवारी लाइसेन्स निकाल्ने सेवा प्रवाह नहुँदा त्यहाँका नागरिकहरुलाई अन्त धाउनपर्ने बाध्यता भएको बताए।
मुख्यमन्त्री गुरुङले कार्यालय व्यवस्थापन सहित सेवा थप गर्ने सम्बन्धमा प्रदेश भौतिक पूर्वाधार विकास मन्त्रालयमा गुनासो पठाउने जानकारी गराए।

सुवेदीलाई सम्पर्कमा मुख्यमन्त्री गुरुङले भने, ‘हामीले नजरअन्दाज गरिरहेको विषयमा यहाँले सुझाव दिनुभयो धेरैधेरै धन्यवाद।तपाईको गुनासोलाई गम्भीरतापूर्वक लिन्छौं ।’

 

बैशाख ३१, २०७६ मा प्रकाशित
प्रतिक्रिया दिनुहोस्