प्रधानमन्त्रीको अभिव्यक्ति संविधान विपरीत छ : मुख्यमन्त्री गुरुङ

पोखरा – संविधानको धारा २३२ ले संघ, प्रदेश र स्थानीय तह बिचको सम्बन्ध सहकारिता, सहअस्तित्व र समन्वयको सिद्धान्तमा आधारित हुने उल्लेख गरेको छ ।

तर प्रधानमन्त्री केपी शर्मा ओलीले प्रदेश र स्थानीय सरकार केन्द्र मातहतका ‘इकाई’ हुन् भन्ने अभिव्यक्ति संविधानको मर्म विपरीत भन्दै प्रदेशका मुख्यमन्त्री बोल्न थालेका छन् ।

विज्ञापन

संघ र प्रदेश सरकारबिच अधिकारको लडाईँबारे बहस चलिरहँदा प्रधानमन्त्रीले दिएको अभिव्यक्तिले पुनः प्रदेश सरकार सशंकित बनेका हुन् । प्रदेश र स्थानीय सरकार संघीय सरकारको इकाई नभई देशको इकाई भएकाले संविधानको मर्म ठूलो भएको गण्डकी प्रदेशका मुख्यमन्त्री पृथ्वीसुब्बा गुरुङले सुनाए ।

प्रधानमन्त्रीले दिएको अभिव्यक्ति संविधानको भावना विपरीत भएको समेत उनले बताए । देश सञ्चारसँग मुख्यमन्त्री गुरुङले भने, ‘प्रधानमन्त्रीको अभिव्यक्तिमा आपत्ति जनाउनु भन्दा पनि संविधानको भावना विपरीत छ ।’

नेपाल सरकार अन्तर्गत प्रदेश र स्थानीय सरकार रहन्छ भन्नु गलत भएको उनले बताए । उनले भने, ‘नेपाल एकीकृत देश हो । त्यसभित्र तीन तहका सरकार छन् । तर नेपाल एकात्मक राज्य होइन । संघीय प्रणालीमा छौँ ।’

‘अधिकार स्पष्ट नभएको सवालमा सहकार्य र सहअस्तित्वको आधारमा गर्ने हो । एकले अर्कालाई विरोध गर्ने होइन । प्रदेशले पनि होइन । संघले पनि होइन ।’

संविधानले तीन तहको सरकारलाई संवैधानिक अधिकार दिएको छ । एकात्मक राज्य जस्तो नेपाल सरकारको मातहत प्रदेश र स्थानीय तह रहनुपर्ने प्रधानमन्त्रीको अभिव्यक्ति गलत भएको उनले बताए । यस्ता अभिव्यक्तिले सहकार्य, सहअस्तित्व भन्दा पनि द्वन्द्व बढाउने मुख्यमन्त्री गुरुङको भनाई छ ।

जेष्ठ ८, २०७६ मा प्रकाशित
प्रतिक्रिया दिनुहोस्