परदेशिएका सन्तानका अभिभावकको मर्म

‘…आउँछन् जहाज, आउँदैनन् छोराछोरी’

काठमाडौँ – बाध्यता होस् या रहरले पुगेका हुन् परदेश उनीहरु । फर्किने कमै हुन्छन् । अधिकांश परदेशमै रुमलिन्छन् । यता घरदेशमा सन्तानको पर्खाईमा बसेका बुवाआमा भने उनीहरुकै सम्झनामा मुश्किलले दिनरात बिताउँछन् ।

बढ्दो उमेर, घरिघरि गरिरहने रोगको आक्रमणले गालिएका बुढापाकाहरु सन्तानको मुख हेर्न नपाई परलोक जाने हो कि भन्ने पिरमा हुन्छन् ।

हुन त परदेशमा रहेका सन्तानहरुका पीडा पनि आफ्नै होलान् । तर अभिभावकको पीडाको कथालाई सुमधुर लयमा समेटेर लोक तथा दोहोरी गायक शिशिर देवकोटाले नयाँ मार्मिक गीत ल्याएका छन् ‘छोरो अमेरिका छ’ ।

उच्च शिक्षा र अवसरका खोजीमा जापान तथा यूरोप र अमेरिकालगायत विभिन्न महादेश नै आफ्नो सपनाको संसार देख्ने तर आफ्ना आमाबाबुको अन्तिम सासमा नफर्कने युवा पुस्ताको प्रवृत्ति र समाजको परिवेशलाई गीतमा समेटिएको छ ।

रोइला (खेली) गायक देवकोटा र गायिका सम्झना भण्डारीले स्वर दिएको सो गीत सोमबार युट्युबमा सार्वजनिक भएको हो । गीतमा रमेश बिजीको शब्द तथा देवकोटाको लय रहेको छ ।

अभिनेता नीर शाह, हिउँबाला गौतम, श्रीप्रसाद थापा र सोनी गुरुङलगायतको अभिनय रहेको सो गीतको भिडियो प्रकाश भट्टले निर्देशन गरेका हुन् । गीतमा जहाज आउने सन्तान नआउने, छोराछोरी भएर पनि नभए जस्तो महसुस गर्नु परेको पीडा समेटिएको छ ।

जेष्ठ १४, २०७६ मा प्रकाशित
प्रतिक्रिया दिनुहोस्