झापामा पनि डेंगु संक्रमित भेटिए

विर्तामोड- सुनसरीको धरानमा फैलिएको डेंगु संक्रमण मोरङ हुँदै झापामा पनि देखा परेको छ।

झापाका तीनवटा स्थानीय तहमा डेंगु संक्रमित भेटिएका जिल्ला जनस्वास्थ्य कार्यालय झापाले जनाएको छ।

स्थानीय तहका स्वास्थ्य प्रतिनिधिहरुले बिहीबार जिल्ला प्रशासन कार्यालयले आयोजना गरेको डेंगु नियन्त्रण सम्बन्धी बैठकमा उक्त तथ्यांक पेश गरेको जनस्वास्थ्य कार्यालय झापाका भेक्टर कन्ट्रोल अधिकृत बेदप्रसाद घिमिरेले जानकारी दिए।

उनले भने, ‘भद्रपुर नगरपालिकामा एकजना, दमक नगरपालिकामा दुईजना र विर्तामोड नगरपालिकामा पाँचजना संक्रमित भेटिएको तथ्यांक हामीलाई आएको छ।’

बिर्तामोडस्थित पूर्णटुङ्ग विर्तासिटी अस्पतालमा ६ जना डेंगु सङ्क्रमित बिरामीको उपचार भइरहेको जनाइएको छ। तीन जना झापा र तीन जना धरानका रहेका छन्।

भद्रपुर नगरपालिकामा एक जना डेंगु सङ्क्रमित बिरामी फेला परेको जिल्ला स्वास्थ्य कार्यालयले जनाएको छ। ती विरामीको मेची अञ्चल अस्पतालमा उपचार भइरहेको जनाइएको छ। त्यसैगरि दमक अस्पतालमा दुई जना डेंगु सङ्क्रमितको उपचार भइरहेको जनाइएको छ।

बिहीबार जिल्ला प्रशासन कार्यालय झापामा भएको बैठकमा डेंगु फैलिन नदिन सबै उपाय अपनाउने निर्णय भएको प्रमुख जिल्ला अधिकारी जनकराज दहालले जानकारी दिए।

सबै नगरपालिका तथा गाउँपालिकाले एडिज एजिप्टाई प्रजातिको लामखुट्टे, अण्डा तथा लार्भा नस्ट गर्ने अभियान चलाउने निर्णय भएको उनले बताए।

जेष्ठ ३०, २०७६ मा प्रकाशित
प्रतिक्रिया दिनुहोस्