एकै दिन ३०५ जना पर्यटक सिमकोटमा ओर्लिए

सिमकोट विमानस्थलमा पर्यटक ल्याउन–लैजान विमान र हेलिकप्टरहरुलाई भ्याई नभ्याई छ ।तस्बिर : राजन रावत/हुम्ला

हुम्ला, सिमकोट – मानसरोवर कैलाशको सिजन सुरु भएयता एकै दिन ३०५ जना पर्यटक सिमकोट विमानस्थलमा ओर्लिएका छन् ।

नेपालगञ्जबाट उनीहरु सिमकोट पुगेका हुन्, एकै दिनमा त्यहाँ पुगेका पर्यटकको यो संख्या अहिलेसम्मकै बढी हो । मासरोवर कैलाश जानेको चाप बढ्दा र मौसमले साथ दिँदा एक दिनमा यति धेरै पर्यटकहरु भित्रिएका हुन् ।

शुक्रबार नेपालगञ्जबाट सिमकोटका लागि ३०५ जना भारतीय पर्यटकहरु भित्रिएको विमानस्थल प्रहरीले जनाएको छ । यो संख्या हालसम्मकै सबै भन्दा बढी एक दिनमा पर्यटक जिल्लामा भित्रिएका हुन । यस अघि एक दिनमा दुई सयसम्म पर्यटक भित्रिएका थिए ।

शुक्रबार १४३ जना महिला र १६२ जना मानसरोवर कैलाश जाने भारतीय पर्यटक नेपालगञ्जबाट सिमकोट ओर्लिएका हुन् । यी पर्यटक ओसार्न नेपालगञ्जबाट सीता, तारा र समिट एयरका जहाजले २५ उडान गरेका थिए ।

सिमकोटबाट हिल्सा पनि हालसम्मकै सबै भन्दा बढी ४५ पटक भन्दा बढी हेलिकोप्टरले उडान भरेका थिए । गत जेठ ४ गतेदेखि मानसरोवर कैलाश जाने यात्रु भित्रिन सुरु भएको थियो ।

जेष्ठ ३२, २०७६ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू