चौतर्फी दबाबपछि ‘ब्याक’ सर्‍यो प्रहरी, संगीत श्रोतापछि रसुवाली कविलाई पनि छाड्ने तयारी

रसुवाली कवि

काठमाडौ‌ं- नेत्रविक्रम चन्द ‘विप्लव’ नेतृत्वको नेकपासँग संलग्न रहेको आरोपमा पक्राउ गरिएका कवि  ठाकुरप्रसाद तिमल्सिना ‘रसुवाली कवि’ र अर्का पत्रकार तथा कवि संगीत श्रोताको गिरफ्तारीलाई लिएर प्रहरी आलोचित बनेको छ।

चौतर्फी दबाबलगत्तै प्रहरीले संगीत श्रोतालाई छाडेको थियो भने रसुवाली कविलाई पनि छाड्ने तयारी भइरहेको काठमाडौं प्रहरी प्रवक्ता डीएसपी होबिन्द्र बोगटीले जानकारी दिए।

उनले सोधपुछका लागि मात्र उनीहरुलाई नियन्त्रणमा लिइएको र अब छाड्ने तयारी भइरहेको बताए। ‘हाजिरी जमानीमा छाड्ने तयारी भइरहेको छ’, डीएसपी बोगटीले भने। काठमाडौं प्रहरीले दुवै जनालाई बुधबार अपरान्ह प्रदर्शनीमार्गबाट पक्राउ गरेको हो।

कवि तथा पत्रकार संगीत श्रोतालाई महानगरीय प्रहरी वृत्त सिंहदरबारमा पुर्‍याइएलगत्तै छाडिएको थियो।

विप्लव कार्यकर्ता भएको आरोपमा यसअघि पनि पक्राउ परेका रसुवाली कवि तीन साताभन्दा बढी प्रहरी हिरासतमा बसेर छुटेका थिए। उनलाई राज्य विप्लवको मुद्दा चलाइएको थियो।

असार ११, २०७६ मा प्रकाशित
प्रतिक्रिया दिनुहोस्