साउदी युवराजलाई ‘मेरो साथी’ भनेका ट्रम्पले उत्तर कोरियाका नेता किमलाई गरे भेटको प्रस्ताव

सञ्चार संवाददाता

अमेरिकी राष्ट्रपति डोनाल्ड ट्रम्पले उत्तर कोरियाका नेता किम जोङ–उनलाई भटेका लागि निम्तो दिएका छन् । राष्ट्रपति ट्रम्पले ट्वीट गरेर डिएमजेड क्षेत्रमा भेटका लागि आह्वान गरेका हुन् ।

डिएमजेड अर्थात डिमिलिटराइज्ड जोन, उत्तर र दक्षिण कोरियाको त्यो क्षेत्र हो जसले दुई देशलाई छुट्याउँछ । जी–ट्वेन्टी सम्मेलनका लागि जापानमा रहेका ट्रम्प त्यसपछि दक्षिण कोरियाको भ्रमणमा जाने छन् ।

उनी शनिबार दक्षिण कोरियाको राजधानी सिओल पुग्ने छन् । दुई दिनको दक्षिण कोरिया बसाईको क्रममा ट्रम्पले उत्तर कोरियासँग रोकिएको परमाणु निशस्त्रिकरण सम्बन्धी वार्तालाई पुनः जीवन दिने प्रयास गर्ने छन् ।

ओसाकामा भएको जी–ट्वेन्टी सम्मेलनलाई सम्बोधन गरेका ट्रम्पले पत्रकारसँगको कुराकानीमा किमसँगको भेटका लागि प्रयास भइरहेको उल्लेख गरेका छन् । उनले भने, ‘यदी उनी (किम) यहाँ उपस्थित भएको भए हामीबिच भेटवार्ता हुने थियो दुई मिनेटका लागि ।’


ट्रम्पले सम्मेलनको क्रममा साउदी अरेबियाका क्राउन प्रिन्स (युवराज) मोहम्मद बिन सलमान (एमबिएस) सँग भेटवार्ता गरेका छन् । वर्किङ्ग ब्रेकफास्टको क्रममा ट्रम्प र एमबिएसबिच कुराकानी भएको हो ।

ट्रम्पले एमबिएस आफ्नो साथी रहेको बताएका छन् । पत्रकार जमाल खाशोग्गीको गएको वर्ष भएको हत्यामा क्राउन प्रिन्स एमबिएसको निर्देशन रहेको आरोप रहेको छ । तर ट्रम्पले भने वासिङ्गटन पोस्टका पत्रकार खाशोग्गीको हत्यामा एमबिएसलाई बित्थामा आरोप लगाइएको बताएका छन् ।

ट्रम्पले चीनका राष्ट्रपति सी जिनपिङसँग भेट गर्ने तयारी छ ।

असार १४, २०७६ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू