कंगोमा फैलिएको इबोला महामारी विश्वव्यापी चासोको स्वास्थ्य आपतकाल
विश्व स्वास्थ्य संगठन (डब्लुएचओ) ले प्रजातान्त्रिक गणतन्त्र कंगोमा फैलिएको इबोला महामारीलाई ‘पब्लिक हेल्थ इमर्जेन्सी अफ इन्टरनेशनल कन्सर्न’ अर्थात अन्तर्राष्ट्रियस्तरमा चासो दिइनु पर्ने जनस्वास्थ्य आपतकाल रहेको बताएको छ ।
डब्लुएचओले कंगोमा फैलिएको इबोला संकटलाई जनस्वास्थ्यमा अन्तर्राष्ट्रिय आपतकाल रहेको घोषणा गरेको हो ।
इबोलाविरुद्धको अभियानका लागि सम्पन्न देशहरुले थप आर्थिक सहयोग गर्नु पर्ने देखिएको छ । डब्लुएचओको घोषणाले थप आर्थिक सहयोगका लागि बाटो खुल्ला गर्ने अपेक्षा गरिएको छ ।
डब्लुएचओले जनस्वास्थ्यमा विश्वव्यापी चासोको आपतकाल घोषणा गरे पनि कंगोका सीमा क्षेत्र बन्द गर्नु पर्ने अवस्था भने नरहेको उल्लेख गरेको छ । कंगोका इबोला ग्रस्त क्षेत्र भन्दा बाहिर यसको संक्रमण फैलिने सम्भावना उच्च नरहेको डब्लुएचओको भनाई छ ।
इबोला महामारीका कारण कंगोमा अहिलेसम्म १६ सय जना भन्दा बढीको ज्यान गएको छ । यहि हप्ता गोमा क्षेत्रमा इबोलाको पहिलो संक्रमण पुष्टि भएको थियो । गोमा क्षेत्रमा १० लाख भन्दा बढी मानिसको बसोबास छ ।
सन् २०१४ देखि २०१६ सम्म पश्चिम अफ्रिकी क्षेत्रमा फैलिएको इबोला महामारीका कारण ११ हजार भन्दा बढीको ज्यान गएको थियो । कंगोमा पछिल्लो पटकको महामारी सन् २०१८ को अगस्टमा सुरु भएको हो ।
कंगोका नर्थ किभू र इतुरी प्रान्तमा महामारी छ । हालसम्म २५ सयजना भन्दा बढीमा संक्रमण पुष्टि भएकोमा १६ सय भन्दा बढीको ज्यान गइसकेको छ ।
संक्रमण फैलिएको २२४ दिनमा संक्रमित हुनेको संख्या एक हजार पुगेको थियो, तर त्यसको थप ७१ दिनमा संख्या दुई हजार पुग्यो । हाल दैनिक १२ जनामा इबोलाको नयाँ संक्रमण पुष्टि हुने गरेको छ ।
इबोला विरुद्धको खोप छ र हालसम्म एक लाख ६१ हजारमा खोप लगाइएको डब्लुएचओले उल्लेख गरेको छ । तर अझै पनि खोप लगाउन बाँकी धेरै छन् ।
