दोर्दीखोलाको बाढीमा बगेका चारको शव भेटियाे, केहीकाे जीवितै उद्दार

लमजुङ– भारी वर्षासँगै दोर्दीखोलामा आएको बाढीले बगाएका चार जनाको शव भेटिएको छ।

आज दिउँसो दोर्दी गाउँपालिका– ६ ढोडेनीमाथि लेकबाट अचानक बाढी आउँदा दोर्दीखोलाले बगाएको चार जनाको शव दोर्दी गाउँपालिकाका विभिन्न स्थानमा भेटिएको जिल्ला प्रहरी कार्यालयका प्रहरी नायब उपरीक्षक रवीन्द्रमान गुरुङले जानकारी दिए।

प्रहरीका अनुसार शव भेटिए पनि पहिचान हुन सकेको छैन। आधा दर्जनभन्दा बढीको घाइते अवस्थामा उद्धार गरिएको प्रहरी नायब उपरीक्षक गुरुङले बताए।

उक्त क्षेत्र आसपासका स्थानीय र दोर्दी करिडोरमा निर्माणाधीन जलविद्युत् आयोजनामा कार्यरत कामदार बाढी आउँदा भागेका थिए।

दोर्दीखोलामा निर्माणधीन २५ मेगावाट क्षमताको माथिल्लो दोर्दी ‘ए’ जलविद्युत् आयोजनामा क्षति पुगेको र काम गर्ने ठाउँमा बाढी छिर्दा धनजनको क्षति भएको आयोजनाका सञ्चालक राजेन्द्र वस्तीले बताए। उनका अनुसार केही कामदार पुरिएको आशङ्का गरिएको छ।

नौथर शेराका स्थानीय लक्ष्मण गुरुङले घाइतेलाई स्थानीयले उपचारका लागि विभिन्न अस्पतालमा पठाएको बताए।

प्रहरी घटनास्थलतर्फ जाँदै गरेको र के कति धनजनको क्षति भएको भन्ने सबै जानकारी आउन बाँकी रहेको प्रहरीले जनाएको छ।

साउन ८, २०७६ मा प्रकाशित
प्रतिक्रिया दिनुहोस्