विप्लव समूहद्वारा सुदूरपश्चिमका १३ वटा एनसेल टावरमा आगजनी

फाइल तस्बिर

धनगढी– नेत्र विक्रम चन्द विप्लव नेतृत्वको नेपाल कम्युनिष्ट पार्टीले सुदूरपश्चिम प्रदेशका १३ वटा स्थानमा रहेका एनसेल टावरमा आगजनी गरेको छ।

कैलाली, बझाङ, बैतडी, अछाम, डडेलधुरा र बाजुराका विभिन्न स्थानमा रहेका १३ वटा एनसेल टावरमा विप्लव समूहले आगजनी गरेर क्षति पुर्‍याएको संघीय प्रहरी इकाई धनगढीले जनाएको छ।

प्रहरीका अनुसार कैलालीका चार, बझाङका तीन, अछामका दुई, डडेलधुरामा एक र बाजुरामा एक गरी १३ वटा टावरमा आगजनी गरेको संघीय इकाई प्रहरी प्रमुख डिआइजी तारायणीदत्त लम्सालले जानकारी दिए।

प्रहरीका अनुसार कैलालीको धनगढी वडा नम्बर–६, जानकीनगर गाउँपालिका वडा नम्बर–२ र ४, गोदावरीको मालाखेतीमा रहेको एनसेल टावरमा विप्लवले आगजनी गरेको हो।

यसै गरी बझाङको चिर वित्थड गाउँपालिका स्थित धारीडाँडामा रहेको एनसेल टावरसँगै जिल्लाका थलारा गाउँपालिका र मष्टा गाउँपालिकामा रहेका टावरमा पनि विप्लव माओवादीले आगजनी गरेको संघीय प्रहरी इकाई धनगढीले जनाएको छ।

यसै गरी अछामको विनायकमा रहेका टावर, डडेलधुराको काफलिगाढमा रहेको टावर र डोटीको जोरायलमा रहेको टावरमा पनि आगजनी गरेको डिआइजी लम्सालले जानकारी दिएका छन्।

यी बाहेक बाजुरा, बैतडी र कञ्चनपुरमा पनि एनसेल टावरमा आगजनी भएपनि कुन स्थानको हो भन्ने एकिन भईनसकेको उनले बताए।

टावरमा आगजनीपछि केही स्थानमा टेलीफोन सेवा अवरुद्ध भएको प्रहरीले जनाएको छ।

साउन १६, २०७६ मा प्रकाशित
प्रतिक्रिया दिनुहोस्