रक्सी खाएर होहल्ला गर्नेलाई छुटाउन राजनीतिक दबाब अस्वीकार्य, विवरण खुल्ने गरी सार्वजनिक गरिने

burst

हुम्ला, सिमकोट – मदिरा सेवन गरी होहल्ला गर्ने व्यक्ति जो कोहीलाई पनि पक्राउ गरी विवरण खुल्ने गरी सार्वजनिक गर्ने हुम्लाका स्थानीय अधिकारीले बताएका छन् ।

जाँडरक्सी सेवनका कारण अवान्छित गतिविधि बढ्न थालेपछि यस्ता गतिविधि न्यूनीकरण गर्न सरोकारवाला पक्षसँगको छलफल पछि स्थानीय प्रशासनले यस्तो निर्णय गरेको हो ।

विज्ञापन

घरेलु मदिरा नियन्त्रण गर्न र शिलबन्दी मदिराको प्रयोग व्यवस्थित गर्न अभियान सञ्चालन गर्नु अनिवार्य रहेको बताउँदै प्रमुख जिल्ला अधिकारी बिनिता भट्टराईले विभिन्न घटनाको मुख्य कारण मदिरा देखिएकाले स्थानीय प्रशासन यस विरुद्ध लाग्ने बताईन् ।

सदरमुकाम समेत रहेको सिमकोट गाउँपालिकामा अब मदिरा बेलुका चार बजेदेखि आठ बजेसम्म मात्र बिक्री वितरण गर्न पाइने भएको छ । अपराधिक घटनाहरु बढी मदिरापान कै कारण हुन थाले पछि जनै पूर्णिमाको पूर्वसन्ध्यामा बसेको जनप्रतिनिधिहरु र सरोकारवाला पक्षको बैठकले सो निर्णय गरेको हो ।

त्यसैगरी बैठकले मदिरा सेवन गरेर होहल्ला गर्ने व्यक्तिहरुलाई प्रहरीले पक्राउ गर्ने र मापसे जाँचपछि एक रात अनुसन्धानका लागि हिरासतमा राखेर जरिवाना गरी छोड्ने र यसरी मदिरा सेवन गरेर पक्राउ परेको व्यक्तिहरुको हिराईका लागि राजनीतिक दलका नेता, जनप्रतिनिधिहरु कसैले दबाब दिन नपाइने निर्णय गरिएको सहायक प्रमुख जिल्ला अधिकारी महेश कुमार पोखरेलले बताए ।

हुम्ला आउने ढुवानी अनुदानको खाद्यान्नबाट घरेलु मदिरा उत्पादन हुने र यसको प्रयोगले समाजमा हिंसा तथा अपराधिक घटनाहरु बढ्ने गरेको बैंकले निष्कर्ष निकालेको थियो ।

बैठकमा सिमकोट र खार्पुनाथ गाउँपालिकाका अध्यक्ष क्रमश पदमबहादुर लामा, कर्णबहादुर रावल, ताँजाकोट गाउँपालिकाका उपाध्यक्ष मन्जु बुढा, अदानचुलीका उपाध्यक्ष सौमती ऐडी सिमकोट , खार्पुनाथ र ताँजाकोट गाउँपालिकाका वडा अध्यक्षहरुको उपस्थिति रहेको थियो ।

साउन २९, २०७६ मा प्रकाशित
प्रतिक्रिया दिनुहोस्