बीच सडकमा पसल, चाडपर्वको सुरुवात

नेपालगञ्ज – सदरलाइन । त्रिभुवनचोकदेखि त्रिवेणीमोडसम्म । जब बीच सडकमा पसल लाग्छन्, बुझ्नु पर्छ हिन्दुका चाडपर्व शुरु भए । यो सडक खण्डको ‘बीच बाटो’ मा पसल लाग्नु परम्पराजस्तै हो । यतिबेला जनै पूर्णिमा अर्थात रक्षाबन्धनका लागि सडकमा पसल लागिसकेका छन् ।

हिमाल, पहाड र तराईमा जनै पूर्णिमा धुमधामले मनाउने गरिन्छ । तराईमा जनै पूर्णिमासँगै रक्षाबन्धनको छुट्टै महत्व रहेको छ । दिदी बहिनीले दाजुभाईलाई दीर्घायूको कामना गर्दै रक्षाबन्धन बाधिदिन्छन् । नेपालगञ्जको त्रिभुवनचोकदेखि त्रिवेणीमोडसम्मको बीच सडकमा रक्षाबन्धनका सामान र मिठाई पसल लागिसकेका छन् ।

बीच सडकमा पसल राखिँदा यात्रामा अलिकति असहज भएपनि यसलाई यहाँका बासिन्दाले सहज रुपमा लिने गर्दछन् । नेपालगञ्ज उपमहानगरपालिकाले चाडविशेषमा लाग्ने पसललाई व्यवस्थित गर्ने प्रयास गर्दै आएको छ । एउटा पसल राखेवापत अढाई सयको पर्चा काट्नु पर्ने पसलेहरु बताउँछन् ।

नेपालगञ्जको सदरलाइन मुख्य बजारअन्तर्गत नै पर्दछ । बीच सडकमा राखिने सामान त पुरानै पसलहरुमा राखेर बेच्दा पनि हुन्थ्यो । तर, वर्षौदेखि बीच सडकमा चाडपर्व विशेष एकैप्रकारका सामानका पसल राखेर ग्राहकलाई सुविधा दिने गरिएको छ ।

सदरलाइनको सडक राम्रो नहुँदा होस् या अहिले एडीबीले राम्रो बनाइदिंदा, बीच सडकमा पसल त लागेकै छन् । पसले कमल लखेर भन्छन्, ‘चाडपर्व विशेषमा बीच सडकमा लाग्ने पसलबाट हामीलाई राम्रो कमाई हुन्छ । ग्राहकले एकै ठाउँबाट सामान पनि पाउँछन् ।’

हुन त केही वर्षअघि बीच सडकमा पसल राख्न नदिने कि भनेर नगरपालिका लागेको थियो । प्रहरी लगाएर पसल लगाउन नदिने रणनीति पनि बनाएको थियो । तर, यहाँका व्यापारीले त्यसको प्रतिकार गरे । धेरै दिन नलाग्ने भएको र वर्षौदेखि लाग्दै आएको पसल लगाउन दिन नगरपालिका बाध्य भयो । चार पांग्रे साधनलाई प्रवेश नदिंदा बीच सडकमा लागेको पसलले खासै अप्ठेरो नपार्ने सम्बद्धहरु बताउँछन् ।

सदरलाइनमा अलि लामो समयका लागि तिहारमा पसल लाग्छन् । अरु चाडपर्वमा २/३ दिनका लागि पसल लगाउने गरिन्छ । बाहिरबाट आएका यात्रुलाई असहज लागेपनि यहाँका रैथानेले बीच सडकमा लागेको पसललाई स्वभाविक रुपमा लिने मात्रै गरेका छैनन्, त्यस्तो पसल देखेपछि चाडपर्व भित्रिएको धारणा बनाउँछन् ।

स्थानीयवासी अनिल श्रेष्ठ भन्छन्, ‘बीच सडकमा पसल लागेको देख्दा चाडबाडको रौनक बढेकोजस्तो लाग्छ ।’

साउन २९, २०७६ मा प्रकाशित
प्रतिक्रिया दिनुहोस्