आत्महत्याअघि पत्रकार पुडासैनीको भिडियो : युवतीलाई अघि सारेर रवि लामिछानेले मलाई मर्न बाध्य पारे

रवि लामिछानेसँग शालिकराम पुडासैनी। तस्बिर: शालिकराम पुडासैनीको फेसबुक।

काठमाडौँ- दुई साताअघि चितवनको एक होटलमा आत्महत्या गरेका पत्रकार सालिकराम पुडासैनीको मृत्यु हुनुअघि रेकर्ड गरेको भिडियो सार्वजनिक भएको छ। उनी आफैँले रेकर्ड गरेको भिडियोमा पुडासैनीले आफूलाई रवि लामिछानेसहित तीन जनाले मार्न बाध्य बनाएको आरोप लगाएका छन्।

भर्खरै आफूसँग टाढिएकी प्रेमिकालाई अघि सारेर रवि र युवराज कँडेलले आत्महत्या गर्न बाध्य बनाएको पुडासैनीले भिडियोमा आरोप लगाएका छन्। रवि चर्चित टेलिभिजन कार्यक्रम ‘सिधा कुरा जनतासँग’का सञ्चालक हुन्। यो कार्यक्रम न्युज ट्वेन्टी फोर टेलिभिजनबाट प्रशारण हुन्छ। कँड‍ेल पनि उक्त टेलिभिजनसँग आबद्ध छन्।

विज्ञापन

आफू न्युज ट्वेन्टी फोर टेलिभिजन छाड्ने मनस्थितिमा पुगेपछि युवराजले अस्ट्रेलिया लैजाने युवती मिलाइदिने भन्दै ती युवती (पछि प्रेमिका)सँग  भेट गराएको र त्यसपछि ती युवतीसँग सबै खालको सम्बन्ध भएको पुडासैनीले भिडियोमा बोलेका छन्। प्रेमिकाको व्यवहार मन नपरेपछि आफू टाढिएको र पछि न्युज ट्वेन्टी फोर टेलिभिजन नै छाडेको उनले भिडियोमा बताएका छन्।

‘तर मैले न्युज ट्वेन्टी फोर छाडेपछि साथीहरुले तँलाई रवि र युवराज मिलेर फसाँउदैछन् भन्ने सुनेँ। वास्तवमा मलाई प्रेमिका, रवि र युवराज मिलेर मर्न बाध्य बनाएका हुन्’, भिडियोमा पुडासैनीले भनेका छन्। उनले आफू धेरै समयअघिदेखि नै डिप्रेसनमा रहेको आरोप पनि लगाएका छन्। उनले ‘सिधा कुरा जनतासँग’ कार्यक्रममा संलग्न रहेको बेला आफूलाई धेरै शारिरीक तथा मानसिक दुर्व्यवहार भएको आरोप पनि लगाएका छन्। पुडासैनी विवाहित थिए।

गम्भीर आरोपको भिडियो सार्वजनिक भएपछि रवि लामिछानेले आरोप प्रमाणित भए हदैसम्मको सजाय भोग्न तयार रहेको बताएका छन्। ‘आरोप लगाउने मरेर गएपनि आरोप खेप्ने म जिउँदै छु।मर्नेले लगाएको एउटा मात्रै आरोप प्रमाणित होस्, र हदै सम्मको सजाय होस्। थप जानकारी केही समयमा गराउने छु। सारा आरोप सुन्दा लाग्यो शालिकराम लाई ठूलो भ्रम परेछ’, रविले  सामाजिक सञ्जालमा लेखेका छन्।

साउन २९, २०७६ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू