सगरमाथा आरोहणका नयाँ नियम राख्न सुझाव

सर्वोच्च शिखर सगरमाथा चढ्न चाहनेले ६५ सय मिटर अग्लो हिमाल चढेको हुनु पर्ने

काठमाडौँ – विश्वको सर्वोच्च शिखर सगरमाथा आरोहण गर्न चाहने जो कोहीले त्यो भन्दा अघि ६ हजार पाँच सय मिटर उचाईको हिमाल आरोहण गर्नु पर्ने नियम लागु गर्न सुझाव दिइएको छ ।

संस्कृति, पर्यटन तथा नागरिक उड्डयन मन्त्रालयले गठन गरेको नेपालको पर्वतीय पर्यटन सुधार सुझाव समितिले तयार पारेको प्रतिवदेनमा विश्वको सर्वोच्च शिखर सगरमाथाको आरोहण पूर्व जो कोहीले पनि ६ हजार पाँच सय मिटर भन्दा अग्ला हिमालको आरोहणको व्यवस्था गर्न सुझाव दिइएको छ ।

विज्ञापन

यो वर्षको आरोहण सिजनमा सगरमाथामा आरोहीको लामो लाइन अर्थात जाम परेको र त्यसका कारण केही आरोहीको मृत्यु भएको खबर राष्ट्रिय–अन्तर्राष्ट्रिय सञ्चारमाध्यममा आएपछि सरकारले सुझाव समिति गठन गरेको थियो ।

समितिले यो सिजन मृत्यु भएका आरोहीको निधनको कारण जाम नभइ प्रतिकूल मौसम र हाइअल्टिच्यूट का कारण भएको निष्कर्ष निकालेको छ ।

तर सुरक्षात्मक उपायका लागि आरोहीले सगरमाथाको आरोहण अनुमति पाउनु पूर्व ६५ सय मिटर उचाईको हिमाल चढेको हुनु पर्ने सुझाव दिइएको छ । यस्तो सुझाव दिनुको कारण आरोहीको शारीरिक क्षमता तथा आरोहण अनुभवका लागि हो ।

यो वर्ष विश्वको सर्वोच्च शिखर सगरमाथाको आरोहण गर्नेको संख्या ८८५ हो । जसमा ६४४ जनाले नेपाल तर्फको दक्षिणी मार्गबाट आरोहण गरेका हुन् । यस्तै तिब्बत तर्फको उत्तरी मार्गबाट आरोहण गर्नेको संख्या २४१ रहेको जनाइएको छ ।

सगरमाथा आरोहणको क्रममा यो वर्ष ११ जनाको ज्यान गयो, जसमा नेपाल तर्फबाट गएका ९ जना छन् । तिब्बत तर्फबाट गएका दुईजनाको ज्यान गएको हो । ज्यान गएका मध्ये चार जनाको मृत्युको कारण ट्राफिक जाम रहेको बताइन्छ । तर नेपालले त्यो कुरा अस्वीकार गर्दै आएको छ । अन्तर्राष्ट्रिय सञ्चारमाध्ममा भने लगातार यो कुरा आइरहेको छ ।

सुझाव समितिले आरोहीको मृत्युको कारण सगरमाथामा लागेको ट्राफिक जाम एकल कारण नरहेको बताए पनि लाइनमा बस्नु पर्दा चिसो ठाउँमा आरोहीलाई गाह्रो भएको र सोही कारण मृत्यु भएको हुन सक्ने कुरा भने अस्वीकार गरिएको छैन ।

तर विज्ञहरुले मृत्युको कारण भीड भन्दा पनि आरोहीमा अनुभवको अभव रहनु रहेको बताएका छन् । सीधै सगरमाथा आरोहणका लागि जाँदा उनीहरुमा हिमाल आरोहणको अनुभव नहुने र त्यसले गर्दा समस्या हुने गरेको देखिएको उनीहरुको भनाई छ । यही कारण सुझाव समितिले सगरमाथाअघि ६५ सय मिटरको हिमाल अनिवार्य रुपमा आरोहण गर्नु पर्ने व्यवस्था गर्न सुझाव दिएको हो ।

हालसम्म नेपालमा सगरमाथा आरोहण गर्न चाहने विदेशीले ११ हजार अमेरिकी डलर तिरे पुग्ने गरेको छ।

तर सुझाव समितिले सगरमाथाका लागि कम्तिमा ३५ हजार अमेरिकी डलर तथा अरु ८ हजार मिटर भन्दा माथिका हिमालका लागि २० हजार अमेरिकी डलर शुल्क कायम गर्न पनि सुझाव दिएको छ ।

विश्वका १४ अग्ला हिमाल मध्ये नेपालमा ८ वटा पर्छन्।

साउन ३०, २०७६ मा प्रकाशित
प्रतिक्रिया दिनुहोस्