दुई पत्रकारलाई मन्त्रीको सहयोग

नेपालगञ्ज – शहरी विकास मन्त्री मो. इस्तियाक राईले गम्भीर विरामी रहेका दुई पत्रकारलाई आर्थिक सहयोग गरेका छन् ।

लामो समयदेखि बाँकेमा बसेर पत्रकारिता गरेका रेशम विरही र सुर्खेतका पत्रकार डिलप्रकाश शर्मालाई मन्त्री राईले व्यक्तिगत रुपमा पचास/पचास हजार सहयोग गरेका हुन् ।

गृहनगर नेपालगञ्ज आएको मौका पारेर आइतबार बिहान मन्त्री राईले सहयोग हस्तान्तरण गरेका छन् । नेपाल पत्रकार महासंघ, बाँकेका अध्यक्ष ठाकुरसिंह थारुलाई पैसा हस्तान्तरण गरिएको थियो ।

बाँके जिल्लामा बसेर लामो समयसम्म पत्रकारिता र यही कै सदस्य रहेका विरही क्यान्सर पीडित छन् । पछिल्लो समय चितवनमा बस्दै आएका उनलाई नेपाल पत्रकार महासंघ, बाँकेले सहयोग गर्दै आएको छ ।

महासंघ बाँकेका अध्यक्ष थारुले करिव दुई लाख रुपैयाँ पठाइसकिएको जानकारी दिए । महासंघका सदस्य तथा सहयोगीदाताबाट संकलन गरेर उक्त रकम पठाइएको थियो । अध्यक्ष थारुले मन्त्री राईले दिएको रकम आज नै पठाइने जानकारी दिए ।

देश सञ्चार डटकममा कार्यरत सुर्खेतका पत्रकार शर्मालाई आज नै पैसा पठाइने महासंघका अध्यक्ष थारुले बताए । महासंघ बाँकेले मन्त्री राईसमक्ष विरही र शर्माको नाम नै लेखेर आर्थिक सहयोग गरिदिन पत्र पठाएको थियो ।

मन्त्री राईले दुई पत्रकारलाई आफूले व्यक्तिगत रुपमा पचास÷पचास हजार सहयोग गरेको बताए । ‘महासंघका साथीहरुले बिरामी पत्रकारलाई केही सहयोग गरिदिन आग्रह गर्नु भएको थियो, मैले आज नेपालगञ्ज आएको मौका पारेर हस्तान्तरण गरेको छु, मन्त्री राईले भने ।

भदौ १५, २०७६ मा प्रकाशित
प्रतिक्रिया दिनुहोस्