नेताहरुमा काम गर्ने इच्छाशक्ति नहुँदा देश विकासको गति कम भयाे: रविन्द्र मिश्र

झापा– साझा पार्टीका संयोजक रविन्द्र मिश्रले देश विकास गर्नलाई नेपालमा अहिलेसम्म बनेका कुनै पनि संविधानले बाधा नगरेको बताएका छन्।

शनिवार झापाको विर्तामोडमा आयोजित पार्टीका झापा संयोजक घोषणा कार्यक्रममा बोल्दै मिश्रले संविधान तथा कानुनले नभई राजनीतिक दलका नेतामा काम गर्ने इच्छा शक्ति नभएकाले अहिलेसम्म देश विकासको गति कम भएको बताए।

विज्ञापन

उनले भने, ‘के २०४७ सालको संविधानले देश विकास गर्न रोकेको थियो? कि अहिलेको संविधानले रोकेको छ? काम गर्नका लागि इच्छाशक्ति भए कुनै पनि दस्तावेजले काम गर्न बाधा गर्दैन।’

अमेरिकी तथा युरोपेली मुलुकहरुले नेपालीहरुलाई सहज रुपमा भिजा दिने व्यवस्था भए नेपालमा पढेलेखेकाको संख्या अत्यन्त न्यून हुने मिश्रको भनाइ थियो। उनले पढेलेखेकाहरु देशमा बस्न नरुचाएका कारण दैनिक धेरै नेपाली विदेशिने गरेको बताए।

उनले भने, ‘विदेश जान सहज रुपमा भिजा नपाएकाले मात्र पढेलेखेका नेपालीहरु देशमा छन्। नत्र कोही पनि देशमा बस्न मन गरेका छैनन्।’

आफ्नो पार्टी सरकारमा गएको खण्डमा क्याविनेटको पहिलो बैठकले कर्मचारीका संगठन खारेज र २०४८ पछि सत्तामा बसेका राजनीतिक दलका नेताका सम्पत्ति छानविन गर्ने मिश्रले बताए।

उनले भने, ‘भ्रस्टाचारको जालो काठमाडौंमा छ। हामी सरकारमा जाने वितिक्कै यी दुई काम गरेरै छाड्छौँ।’

भदौ २१, २०७६ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू