भाषासम्बन्धि सरकारी तथ्याङ्क गलत-उपकूलपति गुरुङ

काठमाडौं-नेपाल प्रज्ञा प्रतिष्ठानका उपकूलपति जगमान गुरुङले भाषासम्बन्धि सरकारको तथ्यांक सही नभएको दावी गरेका छन्।

उपकूलपति गुरुङले केन्द्रिय तथ्यांक विभागले सार्वजनिक गर्दै आएको भाषासम्बन्धि तथ्यांक मिथ्यांकको रुपमा रहेको उल्लेख गर्दै त्यसलाई सच्याउनुपर्ने पनि स्पष्ट पारेका छन्।

बिहीबार केन्द्रिय तथ्याङक विभागले राष्ट्रिय जनगणना २०७८ को तयारीको सन्दर्भमा आयोजना गरेको ‘भाषा तथा जातजाति’सम्बन्धि अन्तरक्रिया कार्यक्रममा बोल्दै उनले भाषा शाष्त्रीहरुले समेत भाषासम्बन्धि तथ्याङकलाई मिथ्यांक बनाउने समस्या रहेको पनि स्मरण गराए।

उपकूलपति गुरुङले भाषा तथा जातजातिसम्बन्धि तथ्याङ्क निर्माण गर्दा समुदाय फरक भए पनि उनीहरुको भाषा एउटै हुने गरेकाले सोही अनुसारको तथ्यांक निर्माण गर्न पनि केन्द्रिय तथ्यांक विभागको गम्भिर ध्यानाकर्षण गराए।

केन्द्रिय तथ्यांक विभागले भाषा तथा जातजातिहरुको तथ्यांक परिमार्जन गर्न सरोकारवाला निकायसँगको छलफललाई निरन्तरता दिएको हो।

विज्ञहरुको सुझावलाई समेत ध्यानमा राखेर भाषा तथा जातजातिहरुको तथ्याङ्क परिमार्जन गर्न सो सम्बन्धि अन्तरक्रिया कार्यक्रम आयोजना गरिएको विभागका उपमहानिर्देशक हेमराज रेग्मीले बताए।

भदौ २६, २०७६ मा प्रकाशित
प्रतिक्रिया दिनुहोस्