जो बाइडेन रेस्लिङ्गका लागि पनि तयार!

आउँदो वर्ष अमेरिकामा हुने राष्ट्रपति चुनावका लागि डेमोक्र्याटिक पार्टीको तर्फबाट उम्मेदवार बन्ने होडमा सबैभन्दा अघि रहेका पूर्व उपराष्ट्रपति जो बाइडेनको उमेरलाई लिएर विभिन्न टिकाटिप्पणी हुने गरेका छन् ।

उम्मेदवार बन्ने होडमा रहेका युवा नेताहरुले उनको उमेर अधिक रहेको भन्दै उमेरकै कारण बाइडेन राष्ट्रपति बन्नका लागि योग्य नरहेको बताउने गरेका छन् । तर बाइडेनले भने आफ्नो उमेरका बारेमा गरिएको प्रश्नलाई व्यंग्यात्मक रुपमा खारेज गरेका छन् ।

पूर्व उपराष्ट्रपति बाइडेन हाल ७६ वर्षका भए । उनले चुनावअघि आफ्नो स्वास्थ्यका अवस्थाका बारेमा सबै जानकारी सार्वजनिक गर्ने उनले बताएका छन् । बाइडेनले एक पत्रकारसँग आफू रेस्लिङ्ग खेल्नका लागि तयार रहेको भनेर व्यंग्य गरेका छन् ।

नेपाली समय अनुसार शुक्रबार बिहान भएको तेस्रो चरणको टेलिभिजन बहसको क्रममा बाइडेनको उमेरका बारेमा टिप्पणी गरेका थिए । उम्मेदवार बन्ने होडमा रहेका युवा नेता जुलियन क्यास्ट्रोले बहसको क्रममा बाइडेनमाथि केही मिनेटअघि भनेको कुरा बिर्सिएको आरोप लगाएका थिए ।

बाइडेन राष्ट्रपतिमा निर्वाचित भएमा अमेरिकाको इतिहासमा सबैभन्दा बढी उमेरका राष्ट्रपति बन्ने छन् । उम्मेवारीको होडमा सामेल हुनु पूर्व बाइडेनले आफ्नो उमेर उम्मेदवारीको होडमा सबैभन्दा चर्चाको विषय बन्ने बताएका थिए ।

भदौ २८, २०७६ मा प्रकाशित
प्रतिक्रिया दिनुहोस्