चितवनमा डेंगी संक्रमितको संख्या दुई हजार नाघ्यो

सांकेतिक तस्बिर

चितवन– जिल्लाका अस्पतालहरुमा साउन महिनायता उपचार गर्न आएका दुई हजार ४६ जनामा डेंगीको सङ्क्रमण देखिएको छ। ६ हजार ६ सय ३९ जनाको नमूना परीक्षण गरिएकोमा सो सङ्ख्यामा सङ्क्रमण देखिएको हो

स्वास्थ्य कार्यालय चितवनका प्रमुख दिपक तिवारीका अनुसार दैनिक सङ्ख्या सङ्क्रमित बढ्दै गएको छ। सरकारी र निजी अस्पतालहरु ज्वरोका बिरामीले भरिएका छन्। डेंगीको सङ्क्रमण बढेसँगै जनचेतनाका कार्यक्रमहरु निरन्तर रुपमा भइरहेको उनले जानकारी दिए।

विज्ञापन

स्वास्थ्यसचिव डा. पुष्पा चौधरी सोमबार चितवन आएर सरोकारवालाहरुसँग अन्तरक्रिया गरेर मातहतका निकायमा आवश्यक निर्देशन दिएको तिवारीले जानकारी दिए।

तिवारीका अनुसार सचिव चौधरीले सबै निकायको संयुक्त प्रयास बिना रोग निधान नहुने भएकाले समन्वय गरी काम गर्न उनले निर्देशन दिएकी छन्।

लार्भा खोज र नष्ट गर अभियान नै उपयुक्त विकल्प भएकाले सोहीअनुसार अघि बढ्न सचिव चौधरीले सबैसँग आग्रह गरेकी थिइन्।

डेंगीका बिरामी थपिँदै जाँदा परीक्षण गर्न कीट अभाव हुने गरेको छ। जसका लागि सहयोग पुर्‍याउन उद्योग वाणिज्य सङ्घ चितवनले आज भरतपुर अस्पताललाई ५०० वटा कीट उपलब्ध गराएको छ।

प्रमुख जिल्ला अधिकारी जितेन्द्र बस्नेतको उपस्थितिमा सङ्घका अध्यक्ष सहनलाल प्रधानले भरतपुर अस्पतालका निमित्त प्रमुख डा प्रकाश खतिवडालाई कीट हस्तान्तरण गरेका हुन्।

यसअघि भरतपुर महानगरपालिकाले एक हजार वटा र रोटरी क्लबको अगुवाइमा ५०० वटा कीट अस्पताललाई उपलब्ध गराइएको थियो।

भरतपुर अस्पतालमा दैनिक ४०० भन्दा बढी ज्वरोका बिरामी आउने गर्दछन्। यसमध्ये १५० हाराहारीको डेंगी परीक्षण गरिने गरेको अस्पतालले जनाएको छ। अस्पतालमा निशुल्क रुपमा डेंगी परीक्षण हुन्छ भने निजीमा महङ्गो शुल्क तिर्नुपर्ने हुन्छ।

भदौ ३१, २०७६ मा प्रकाशित
प्रतिक्रिया दिनुहोस्