यस्ता छन् दश गन्तव्य

घुम्न कहाँ जाने, सोच्दै हुनुहुन्छ?

जाडो न गर्मी रहेको यो मौसम घुम्नलाई उपयुक्त छ । खुलेको आकाश । प्राय सबैतिर हरियाली । चाडबाडको माहोल छ । कामका लागि बाहिर रहेकाहरु घर फर्किँदै छन् । कोही घरमा बसेर चाड मनाउने ध्याउन्नमा छन् । कोही भने बिदाको समयलाई सदुपयोग गरी घुम्न निस्के या निस्कने तयारीमा छन् ।

पहिले विदेशीहरु मात्र लामो यात्रामा निस्केको देखिन्थ्यो । तर अचेल नेपालीहरु पनि साथीभाइसँग योजना बनाएर घुम्न निस्कन्छन् । र यो संख्या बढ्दो छ । बिदाको छेको पारेर विदेश तथा देशकै विभिन्न ठाउँमा घुम्न जानेहरु प्रसस्त छन् ।

विज्ञापन

तपाईँ पनि घुम्न जाने योजनामा हुनुहुन्छ ? यदी हुनुहन्छ भने, नेपालमा धेरै मनोरम स्थान छन् जहाँ परिवार तथा साथीभाइसँग जान सकिन्छ । हामी लामो बिदा तथा केही ट्रकिङका लागि उपयुक्त ठाउँको चर्चा गर्ने छौँ । तर त्यो भन्दा पहिला यात्रामा निस्कनु भन्दा पहिला ख्याल गर्नु पर्ने कुराबारे चर्चा गरौँ । तपाईँ कुन ठाउँ जाने त्यसअनुसारको ब्याग प्याक गर्नुपर्छ । त्यहाँको मौसम अनुसार आफूलाई चाहिने समानको जोहो गर्नु पर्छ ।

पहाड तथा हिमाली क्षेत्रमा यात्रा गर्दा चाहिने समान र तराईमा यात्रा गर्दा चाहिने सामान फरक हुन्छन् । चिसो बढ्दै छ पहाड र हिमालमा जाँदै हुनुहुन्छ भने न्यानो कपडा ब्यागमा राख्न नबिर्सनुहोला ।

जाडोबाट बच्न क्रिम तथा अप्ठ्यारो पर्दा चाहिने प्राथामिक उपचारका सामग्री राख्दा उत्तम हुन्छ । हिमाल क्षेत्रमा हिँड्दा लेक लाग्ने सम्भावना हुन्छ त्यसबाट बच्ने उपायहरु थाहा पाउनु पर्छ । हिमाली क्षेत्रको यात्रामा गर्मी भयो या पसिना आयो भनेर ज्याकेट तथा टोपी फुकाल्नु हुँदैन । चिसोले समाउन सक्छ र विरामी पर्न सकिन्छ । पदयात्रा मार्गमा खानेकुरा पाइने सम्भावना कम हुन्छ, त्यसको जोहो गरेरै गएको राम्रो ।

अब गन्तव्यहरुको कुरा गरौँ, र हाम्रो यात्रा पश्चिमबाट सुरु गरौँ ।

खप्तड

सुदूरपश्चिमका पहाडी जिल्लामा पर्ने यो धार्मिक र प्राकृतिक रुपमा संरक्षित क्षेत्र हो । यो समुन्द्र सतहबाट ३ हजार मिटरको उचाइमा छ । खप्तड बाबाको नामबाट चर्चित यो क्षेत्र बझाङ, बाजुरा, अछाम र डोटी जिल्लामा फैलिएको छ । भौगोलिक परिदृश्यमा हरियाली युक्त हल्का भिरालो चउरहरु, खोला नाला र घाँसे मैदान गरेर २२५ वर्ग किलोमिटर क्षेत्र ओगटेको छ ।

यो मौसममा हरियालीले ढाकिने खप्तड पुस महिनापछि भने सेताम्य हिउँले ढाकिन्छ । वैशाखदेखि असारसम्म रंगीचंगी फूलहरुले फाँटहरु मन लोभ्याउने हुन्छन् । खप्तड क्षेत्रको प्रमुख विशेषता भनेको विशाल फाँटहरुमा फुल्ने रंगीचगी फूलहरु नै हुन् । फूल फुलेका फाँटको किनारमा रुखहरुसहितको सुन्दर बगैँचा गज्जबको अनुभव गर्न पाईन्छ । यहाँ २७० प्रजातिका चरा पाइन्छन् ।

साथै खप्तड बाबाको कुटी, त्रिवेणी नदी, खप्पर दह, शिव मन्दिर, सहस्र लिंग, गणेशस्थान, नागढुंगा, केदारढुंगा जस्ता धार्मिक स्थलहरु पनि छन्, जसले खप्तड क्षेत्रलाई निकै प्रख्यात बनाएका छन् । खप्तड क्षेत्रका रहेका ठूला–साना गरी २२ वटा फाँट पनि आकर्षणका केन्द्र हुन् ।

कसरी पुग्ने ?

खप्तड पुग्न कैलालीको धनगढीसम्मको यात्रा गर्नुपर्छ । धनगढीबाट डोटीको सिलगढीसम्म बसमा आठ घण्टाको यात्रा गरेपछि पैदल हिँड्नुपर्छ । सिलगढीबाट बगलेगसम्म जिप पनि चल्ने भएकाले जिप रिजर्भ गरेर पनि जान सकिन्छ । सिलगढीबाट सुरु भएको पैदल यात्राको पहिलो दिन झिगराना र दोस्रो दिन खप्तड राष्ट्रिय निकुञ्ज प्रवेश गर्न सकिन्छ ।

यस्तै अछामको साँफेबगरबाट झिग्रानासम्म २ घण्टाको बस यात्रा र त्यहाँबाट ८ घण्टाको पैदल यात्रामा खप्तडबाबाको आश्रम पुग्न सकिन्छ । त्यहाँबाट खप्तड दह, सहस्र लिङग, नाग दह, त्रिवेणी धाम । यसका लागि तपाईँको घर तथा यात्रा सुरु गर्ने स्थानबाट कम्तिमा ६ देखि १० दिन छुट्याउँदा हुन्छ ।

रारा ताल

पछिल्लो समय सबैको मन र मुखमा झुण्डिएको ठाउँ हो रारा । घुम्ने पारखीहरु यहाँ कि पुगेका छन् कि प्राथामिकतामा राख्ने गर्छन्् । पश्चिम नेपालको मुगु जिल्लामा पर्ने यो ताल समुन्द्र सतहदेखि २ हजार ९ सय ९० मिटरको उचाईमा छ ।

वरिपरि सल्लाको घारी निलो शान्त ताल, सुन्दरताको एक टुक्राको अनुभव गर्न सकिन्छ । तालले घामको किरण अनुसार आफ्नो रङ बदल्ने गर्छ । रारा तालमा विश्वमै कहीँ पनि नभेटिने स्नोट्राउट प्रजातिको माछा पाइन्छ । तालको पूरा भाग हेर्न ४००० मिटरको उचाईमा तालको दक्षिण पश्चिममा रहेको मुर्माटप उक्लिनु पर्ने हुन्छ ।

कसरी पुग्ने ?

यहाँ पुग्न पनि दुई वटा बाटो छन् । नेपालगञ्जबाट करिब ४० मिनेटको हवाई यात्रामा मुगुको ताल्चा बिमानस्थल उत्रेर त्यहाँबाट करिव ३ घण्टा पैदल यात्रामा ताल पुग्न सकिन्छ ।

यस्तै स्थल मार्ग हुँदै जानको लागि कोहलपुर हुँदै सुर्खेत पुग्नु पर्ने हुन्छ । सुर्खेतबाट दैलेख, कालिकोट सदरमुकाम मान्म, नाग्म र जुम्लाको सिन्जा उपत्यका, भुलभुले हुँदै रारा ताल पुग्न सकिन्छ । गाडीमा करिब २ दिनको यात्रा गर्नुपर्ने हुन्छ रारा पुग्न ।

बर्दिया राष्ट्रिय निकुञ्ज

बर्दिया तराईको सबैभन्दा ठूलो राष्ट्रिय निकुञ्ज हो । नौ सय ६८ वर्ग किलोमिटर क्षेत्रफलमा फैलिएको यो निकुञ्ज बाघ हेर्नका लागि सबैभन्दा उपयुक्त स्थान हो । नेपालको सबैभन्दा लामो नदी कर्णाली र बबईको बिचमा निकुञ्जका केही भागहरु पर्ने भएकाले पनि जनावरका लागि उपयुक्त बनेको छ ।

हाल बबई उपत्यका निकुञ्जमा सबैको आकर्षण बनेको छ । द्धन्द्धकालमा बन्दरहेको निकुञ्जको चुरे क्षेत्रमा रहेको यो ठाउँ हाल खुला गरिएको छ । जहाँ पर्यटकले रात विताउने अवसर पाउँछन् । २०४० सालमा राजा वीरेन्द्रले निकुञ्ज बिस्तार गर्न साबिक सानोश्री पञ्चायतलाई स्थान्तरण गरेका थिए । तिनै ठाउँलाई अहिले बबई उपत्यका भनिन्छ । उपत्यकासम्म पुग्न राष्ट्रिय निकुञ्जको कार्यालय ठाकुरद्धाराबाट करिब १० घण्टाको पैदल यात्रा वा जंगल सफारी पनि गर्न सकिन्छ ।

उपत्यकाबाट सूर्योदय र सूर्यास्त अवलोकन गर्न सकिन्छ । निकुञ्जमा राजस्व तिरेर बबईमा माछा मार्ने व्यवस्था पनि गरिएको छ । तर, माछा मारेर खान पाइँदैन ।

निकुञ्जको ७० प्रतिशन भूभाग साल र यसको सहायक प्रजातिका वनस्पतिले वन ढाकिएको छ । बाँकी ३० प्रतिशत घाँसे मैदान छ । निकुञ्जमा ५४ प्रजातिका स्तनधारी, ४०० प्रजातिका चराचुरुङ्गी, २५ प्रजातिका घस्रने वन्यजन्तु र ६० भन्दा बढी प्रजातिका माछाहरु पाइने निकुञ्जले जनाएको छ ।

राष्ट्रिय निकुञ्ज मात्र नभएर थारु समुदायको मौलिक संस्कृतिका लागि पनि बर्दिया निकै प्रख्यात छ । बर्दियाको विभिन्न स्थानमा खोलिएका होमस्टे र बर्दिया राष्ट्रिय निकुञ्ज नजिकै रहेको ठाकुरद्वारा मन्दिर आन्तरिक तथा बाह्य पर्यटकका लागि प्रख्यात छ

कसरी पुग्ने ?

पश्चिम नेपालको प्रवेशद्वार नेपालगञ्जबाट दुई घण्टाको बस यात्रापछि सहजै पुग्न सकिने यस निकुञ्ज पूर्व–पश्चिम राजमार्गको अम्बासबाट जम्मा १३ किलोमिटर टाढा छ । यसका करिब ५ दिन छुट्याउँदा हुन्छ । बाघ हेर्नको लागि भने केही दिन कुर्नु पर्ने हुनसक्छ ।

शे–फोक्सुण्डो

शे–फोक्सुण्डो राष्ट्रिय निकुञ्ज नेपालको सबैभन्दा ठूलो राष्ट्रिय निकुञ्ज हो । यो राष्ट्रिय निकुञ्ज पश्चिम नेपालको डोल्पा तथा मुगु जिल्लामा फैलिएको छ । यसको क्षेत्रफल ३,५५५ वर्ग किलोमिटर छ । यो निकुञ्ज २०५० सालमा स्थापना गरिएको हो । यस निकुञ्ज भित्र नेपालको सबैभन्दा गहिरो ताल फोक्सुण्डो तथा एक ऐतिहासीक शे गुम्बा रहेका छन् र यिनीहरूकै नाम जोडेर यसको नामाकरण गरिएको हो ।

शे–फोक्सुण्डो ताल ३९०० मिटरको उचाईमा डोल्पा जिल्लामा अवस्थित छ । यस तालको लम्बाइ ४.८ कि. मी., चौडाइ १.६ कि.मी. र गहिराई १४५ मिटर रहेको सन् २००४ मा नेपालको जल तथा मौसम विज्ञान विभागद्वारा एउटा सर्वेक्षणले देखाएको थियो । कान्जिरोवा हिमालको काखमा अवस्थित यो ताल वाई आकारको छ ।

कसरी पुग्ने ?

हवाई यात्रामा नेपालगञ्जबाट सिधै डोल्पाको जुफाल विमानस्थलमा उत्रेर त्यहाँबाट पैदल त्रिपुराहुँदै तालसम्म पुग्न सकिन्छ । स्थलमार्गबाट यहाँ जान बाँकेको कोहलपुर पुग्नुपर्छ । त्यहाँबाट सुर्खेतको छिन्चुहुँदै दायाँ लागेर जाजरकोटको सदरमुकाम खलंगा हुँदै रिन्मा पुग्नु पर्नेहुन्छ ।

भेरी नदीको छेउछेउ खलंगाबाट रिन्मासम्म बसको यात्रा गर्नुपर्ने हुन्छ । रिन्माबाट रुकुमको त्रिवेणीसम्म जिपको यात्रा गर्नुपर्छ । त्रिवेणीबाट खादान र त्रिपुराकोट हुँदै तालसम्म पुग्न सकिन्छ । त्रिवेणीबाट अगाडि पैदल यात्रामा अगाडि बढ्नु पर्ने हुन्छ । हिमालको बाटो चट्टानमा हिँड्नु पर्ने भएकाले त्यहाँ पुग्न अलि धेरै दिन छुट्याउनु पर्ने हुन्छ ।

पुनहिल–पोखरा

आँखै अगाडि विश्वको सातौँ अग्लो धौलागिरी हिमाल । त्यसैले पर्यटकहरु धौलागिरी हिमाल हेर्न म्याग्दीको पुनहिल पुग्छन् । यो स्थान धौलागिरी हिमशृंखला हेर्ने सबैभन्दा उपयुक्त स्थान हो । समुन्द्री सतहबाट ३ हजार २ सय १० मिटर उचाइमा अवस्थित पुनहिलबाट धौलागिरी, अन्नपूर्ण माछापुच्छ्रे, नीलगिरी लगायत १५ वटा हिमालको मनोरम दृश्य अवलोकन गर्न पाइन्छ ।

त्यस्तै पुन हिल अन्नपूर्ण हिमश्रृंखलाको भ्यु पोइन्टको रुपमा पनि लिइन्छ । पुनहिलको बाटोमा जहाँबाट पनि मनै लोभ्याउने सुन्दर दृश्यावलोकन गर्न सकिन्छ । नेपाल घुम्ने सोचमा हुनुहुन्छ भने पुनहिलको ट्रेकिङ गर्न सबैभन्दा उपयुक्त हुन्छ ।

घोरेपानी र पुनहिल ट्रेकलाई एक रगिंन यात्राको रुपमा लिन सकिन्छ । अन्नपूर्ण क्षेत्रबाट सुरु हुने यो यात्रा पोखरा पुगेर टुङ्गिन्छ । नेपालमा पदयात्राका लागि आउने पर्यटकको रोजाइको उत्कृष्ट दशभित्र पुनहिल पदयात्रा पर्छ ।

भन्नु पर्दा पोखरा एक हिसाबले नेपालको पर्यटकीय राजधानी नै हो । एकै स्थानमा ताल, हिमाल, मन्दिर, गुफा अवलोकन गर्न सकिन्छ पोखरामा । यसका साथै साहसिक खेलहरु प्याराग्लाइडिङ, बन्जी, जिप फ्लायर लगायत दर्जनौँ गतिविधि हुने भएकाले पनि यो क्षेत्रलाई पर्यटकीय राजधानी भन्ने गरिन्छ ।

कसरी जाने ?

कास्कीको घोरेपानीबाट आधा घण्टाको उकालो हिँडेपछि पुनहिल पुगिन्छ पुनहिल पदयात्राको क्रममा दुईवटा विकल्प छन् । एक, पुनहिल पदयात्रा मात्र र अर्को, पुनहिल हुँदै अन्नपूर्ण हिमालको आधार शिविरसम्मको यात्रा । पोखरादेखि पुनहिल पुगेर र्फकनका लागि पाँच दिन लाग्छ । अन्नपूर्ण हिमालको आधारशिविर पुगेर फर्कनका लागि भने आठ दिन लाग्छ ।

पोखरादेखि पुनहिल र पुनः पोखरा फर्कनका लागि पाँच दिनको समय छुट्याउनु उपयुक्त हुन्छ । पोखराबाट पहिलो दिन तिखे ढुंगा र दोस्रो दिन घोरेपानी पुग्न सकिन्छ । तेस्रो दिन घोरेपानीबाट सूर्योदयको दृश्यावलोकन गर्न पुनहिल टावर गएर पुनः घोरेपानी आई टाडापानीमा बस्न सकिन्छ । त्यसपछि चौथो दिन घान्द्रुक र पाँचौँ दिन पोखरा पुगिन्छ ।

यस बाहेक पोखरादेखि पुनहिल हुँदै अन्नपूर्ण आधार शिविर पुगेर पुनः पोखरा आउनलाई ११ दिनको पदयात्रा राम्रो हुन्छ । स्वदेशी तथा विदेशी पर्यटकको पहिलो रोजाइमा पर्ने यो स्थान विभिन्न पदमार्गको प्रवेशद्वार पनि हो । अन्नपूर्ण, माथिल्लो मुस्ताङ, पुनहिल लगायत पदमार्गको प्रवेशद्वार पोखरा हो ।

कसरी पुग्ने ?

राजधानी काठमाडौँबाट पोखरासम्म सार्वजनिक बसको यात्रा गर्न सकिन्छ । बस व्यवसायीहरुले पर्यटकलाई लक्षित गरी सुविधासम्पन्न बसको व्यवस्था गरेका छन् । त्यसबाहेक काठमाडौँबाट पोखरासम्म सिधै हवाई सेवाको सुविधा पनि छ । पोखरा पुगेपछि पैदल यात्रामार्फत गन्तव्यमा पुग्न सकिन्छ ।

अन्नपूर्ण

विश्वको चर्चित पदमार्गमध्ये एक हो, अन्नपूर्ण पदमार्ग । विश्वका उत्कृष्ट दश पदमार्गभित्र पर्ने भएकोले यो पदमार्ग विश्वभर परिचित छ । यो पदमार्ग नेपाल आउने विदेशी पर्यटकको पहिलो रोजाइमा पर्ने गर्छ ।

यो क्षेत्रमा पदयात्रा गर्दा सबै स्थानमा टी–हाउस भएकोले पनि अन्य पदमार्ग जस्तो पैदल यात्रीलाई समस्या हुँदैन । ठाउँ–ठाउँमा थकाइ मार्न र चिया–कफीको तलतल मेटाउन सहज हुन्छ । पदमार्गका सबैजसो स्थानमा सुविधासम्पन्न होटल तथा लजहरु भएकाले पदयात्राका क्रममा खान र बस्न सहज हुन्छ ।

कसरी पुग्ने ?

लमजुङको बेसीसहरलाई अन्नपूर्ण पदमार्गको प्रवेशद्वार भनिन्छ । बेसीसहर हुँदै खुदी, भुलभुले, स्याँगे, जगत हुँदै मनाड जिल्लाको ताल, बगरछाप, चामे, थोरङपास हुँदै मनाङ पुगेपछि अन्नपूर्ण पदमार्ग सकिन्छ ।

यस बाहेक पोखरादेखि पुनहिल हुँदै अन्नपूर्ण आधार शिविर पुगेर पुनः पोखरा आउनलाई ११ दिनको पदयात्रा राम्रो हुन्छ ।

मुस्ताङ

उपल्लो मुस्ताङ ट्रेकलाई मुस्ताङको लोकप्रिय क्षेत्र हो । आन्तरिक तथा बाह्य पर्यटकको गन्तव्य स्थल हो उपल्लो मुस्ताङ । विशेष गरी यो मौसममा उपल्लो मुस्ताङ घुम्न लायक गन्तव्य हो । पहिले तिब्बती साम्राज्यको एक भागको रुपमा रहेको ल्हो क्षेत्र सँस्कृति र भौगोलिक दृश्यको कारणले पनि तिब्बत जस्तै लाग्छ । मसोमबाट उपल्लोे मुस्ताङसम्म सवारी साधन चल्न थालेपछि आन्तरिक पर्यटकको पनि चाप बढेको छ ।

जोमसोमबाट सवारी साधनमार्फत एक दिनको यात्रा गरेपछि माथिल्लो मुस्ताङ पुगिन्छ भने पैदल यात्रा गर्दा तीन दिन लाग्छ । माथिल्लो मुस्ताङमा जीवनशैली अन्य जिल्लाहरुको भन्दा फरक भएकोले पनि यो क्षेत्रमा पर्यटकको आगमन बढी हुने गर्छ ।

आश्चर्यजनक खालका चट्टानहरुले घेरिएको र मरुभूमी जस्तो देखिने भौगोलिक दृश्यको बिचमा गाँउहरु र त्यहाँका हरिया खेतहरुले मरुभूमिको बिचमा बगैँचा जस्तो देखिन्छ । यस क्षेत्रमा नौतले गुफा, मौलिक संस्कृति, जीवनशैली, मनमोहक प्राकृतिक दृष्य तथा कोरला नाका प्रख्यात छन् ।

कसरी पुग्ने ?

काठमाडौँबाट नै निजी सवारी साधनमा माथिल्लो मुस्ताङसम्म पुग्न सकिन्छ । काठमाडौंबाट जोमसोमसम्म हवाई यात्रा पनि गर्न सकिन्छ । जोमसोमदेखि छुसाङसम्म जिपको यात्रा गर्नुपर्छ ।

बाटोमा पर्ने खोलामा मोटरेबल पुल नभएकोले पैदल पुल तरेपछि फेरि अर्को गाडी चढेर माथिल्लो मुस्ताङ ६ घण्टामा पुग्न सकिन्छ ।

तिलिचो ताल–मनाङ

तिलिचो ताल आन्तरिक पर्यटकको आकर्षणको केन्द्र बनेको छ । करिब ५ हजार मिटरको उचाइमा अवस्थित यो ताल मनाङमा पर्छ । कूल ४.८ वर्ग किमीभन्दा बढी क्षेत्रफलमा फैलिएको यस ताल वरिपरी सेता टल्किने तिलिचो हिमाल, अन्नपूर्ण रेन्ज र नीलगिरि हिमाल रहेका छन् । हिमालको छाया तालमा परेको दृश्य लोभै लाग्दो हुन्छ ।

तिलिचो ताल विश्वको सबैभन्दा अग्लो उचाइमा रहेको ताल मानिन्छ । अन्नपूर्ण पदयात्रा गर्ने सबैले थोरोङ्ग्ला पास गर्दा यो ताल भएर जाने गर्छन् । मनाङ र तिलिचो तालको बिचमा धेरै लजहरु खुलेका छन् । पदयात्रा मन पराउनेहरुको लागि धेरै नै रोमाञ्चक हुनेछ ।

ताल हेर्नका लागि जुनसुकै समयमा जान सकिँदैन । असोजदेखि मंसिरसम्म र चैतदेखि जेठ महिना उपयुक्त हुन्छ । धेरै अग्लो स्थानमा रहेको र नजिकै रहेका हिमालले गर्दा बढी चिसो र लेक लाग्ने सम्भावना बढी देखिन्छ । तालसँगै मनाङको संस्कृती र भौगोलिक बनोटले पनि सबैको मन लोभ्याउँछ ।

कसरी जाने ?

यहाँ जान कम्तिमा तिन दिन लगाउनु पर्ने हुन्छ । उचाइमा भएका कारण सिधै माथि जाँदा लेक लाग्ने सम्भावना हुन्छ । पहिलो दिन लमजुङको बेसिसहर वा त्यो भन्दा माथि पुग्न सकिन्छ ।

अर्को दिन चामेबाट खाङसार हुँदै तिलिचो बेसक्याम्प बस्नु पर्नेहुन्छ । बेसक्याम्पबाट ४ घण्टामा ताल पुगन सकिन्छ । तालको छेउमा बस्ने व्यवस्था नभएकाले फर्किनु पर्ने हुन्छ ।

पाथीभरा–ताप्लेजुङ

ताप्लेजुङ जिल्लामा रहेको पाथिभरा मन्दिर नेपालका साथै भारतका धार्मिक पर्यटकमाझ पनि चर्चित छ । यो मन्दिरमा बर्सेनि लाखौँ भक्तजन दर्शन गर्न आउने गर्छन् । पाथिभरा मन्दिर समुद्री सतहबाट ३ हजार ७ सय ९४ मिटर उाचाइमा छ ।

कुम्भकर्ण हिमाल हेर्न पनि पाथिभरा उपयुक्त गन्तव्य हो । असोज–कात्तिक महिनामा मौसम सफा हुने भएकाले पनि यतिबेला हिमाल हेर्ने उपयुक्त समय हो ।

कसरी पुग्ने ?

काठमाडौंबाट यात्रा गर्नेहरु इलामको चिया बगान हुँदै पाथिभरा जाने भएकाले निकै रमाइलो अनुभव हुन्छ । यसैगरी काठमाडौँबाट सुकेटारसम्म हवाई यात्रा र त्यसपछि ६ घण्टा पैदल यात्रापछि पुग्न सकिन्छ पाथिभरा ।

काठमाडौँबाट दुई दिनको बसयात्राबाट फेदी पुगेपछि पाँच घण्टाको पैदल यात्रापछि पनि पाथिभरा पुग्न सकिन्छ ।

गोसाईँकुण्ड–रसुवा

धार्मिक रुपमा परिचित गोसाइँकुण्ड टे«किङको लागि पनि उपयुक्त ठाउँ हो । समुन्द्र सतहबाट करिब ४४ सय मिटरको उचाइमा रहेको यो तालसँगै मन लोभ्याउने अरु ६ वटा ताल छन् । गोसाईँकुण्डको किनारै किनार त्रिशूलधारा हुँदै उकालो लागिसकेपछि बायाँ तर्फ छ, बर्दकुण्ड । अलि अगाडि निकण्ठकुण्ड ।

दायाँ तर्फ सजिलै नदेखिने ठाउँमा छ चन्द्रकुण्ड । सबैभन्दा माथि सिरानमा छ सूर्यकुण्ड । सूर्यकुण्डबाट फर्कदा बायाँ तर्फ छ आमाकुण्ड । तल छ भैरवकुण्ड र सबैभन्दा तल छ सरस्वतीकुण्ड । लाङटाङ राष्ट्रिय निकुञ्जका रमणीय दृश्य हेर्दै तालसम्म पुग्न सकिन्छ ।

कसरी पुग्ने ?

यो एक ट्रेकिङ्ग रुट हो । काठमाडौँबाट सुन्दरीजल हुँदै सिन्धुपाल्चोकको चिसापानी, कुटुमसाङ, घोप्टे हुँदै गोसाईँकुण्ड पुगेर चोलाङपाटीको ओरालो झर्दै धुन्चे पुगेर काठमाडौँ फर्कन सकिन्छ । यस्तै ठ्याक्कै त्यसको उल्टो काठमाडौँबाट धुन्चे पुगेर देउराली, धिम्सा, सिङ गोम्पा, चोलाङपाटी, लौरीविनायकको उकालो चढदै गोसाइँकुण्ड पुगेर घोप्टेको ओरालो भरेर सुन्दरीजल हुँदै काठमाडौँ फर्किन सकिन्छ ।

यसका लागि करिब ८ दिन छुट्याउनु पर्ने हुन्छ । यी प्रतिनिधि गन्तव्य मात्रै हुन् । घुम्ने ठाउँहरुको छनौट आफ्नो रुची अनुसार गर्ने हो । तर त्यहाँको मौसम अनुसार यात्राको तयारी भने गर्नु पर्छ ।

 


देश सञ्‍चार प्रालिद्वारा संचालित देश सञ्‍चार डटकममा प्रकाशित कुनै पनि सामाग्री देश सञ्‍चार प्रालिको पूर्व जानकारी विना हुबहु एवं आंशिक रुपमा समेत कपी गरी प्रकाशन गर्नु दण्डनीय छ। यस किसिमका कार्य गर्ने उपर देश सञ्‍चार प्रालि नेपाल कानुनी उपचार खोज्न बाध्य हुने भएकाले सम्बन्धित सबैलाई सचेत हुन जानकारी गराइन्छ।