तिहारका लागि फूलको जोहो बर्खाकै बेला सुरु हुन्छ। आँगनको डिल, खेत–बारीको आलीमा सयपत्री, मखमलीसहितका फूलका बिरुवा रोपिन्छ असार–साउन तिरै । त्यो बेला रोपेको फूल अहिले ढकमक्क फुलेको छ ।

आफ्नो घरमा फूल हुनेहरुले त्यहि टिपेर तिहारमा प्रयोग गर्छन्। घरमा फूल नलगाएकाहरुलाई भने किन्‍नुको विकल्प छैन । किन्नेहरुका लागि मेहनतले फूल उत्पादन गरेका हुन्छन् फूल किसानहरुले ।

व्यवसायिक रुपमा फूलखेती गर्नेहरुका लागि तिहार सबैभन्दा उपयुक्त अवसर हो व्यवसायको । विशेषगरी सयपत्री र मखमली फूल खेती गर्नेहरुको आय आर्जन गर्ने मुख्य बेला नै तिहार हो ।

लक्ष्मी पूजा तथा भाइटीकाका लागि सयपत्री र मखमलीको माला चाहिन्छ । त्यसका लागि बजारमा फूल पुर्‍याउने जिम्मा फूल किसानको हो ।

मखमली फूलका लागि भक्तपुर अति नै प्रख्यात छ । यस्तै सयपत्री फूल खेतीका लागि काठमाडौँको इचङ्गूनारायण । स्वयम्भूबाट पश्चिमतिर इचंगुनारायणका पाखो बारीमा तिहारका लागि रोपेको सयपत्री पहेँलपूर हुने गरी फुलेका छन् ।

देश सञ्चारकी फोटो पत्रकार बर्षा शाह केही दिनअघि इचंगूनारायण पुगेर सयपत्री फूलको रौनकलाई तस्बिरमा समेट्ने प्रयास गरेकी छन् ।