जाडो छल्न बेसी झर्दै डोल्पाली, सरकारी कार्यालय फुर्सदमा

डोल्पा– चिसो बढ्न थालेपछि डोल्पाका स्थानीयवासीहरु बेसी झर्न थालेका छन्। दशैँ, तिहार जस्ता ठूला पर्व सकिएलगत्तै जिल्लाका स्थानीयवासीहरु तातोको खोजीमा जिल्ला छोड्न थालेका हुन् ।

कर्णालीका जिल्लाहरुमा दिन प्रतिदिन चिसो बढ्दै जाँदा हिमपात हुने सम्भावना पनि रहेको छ। दैनिकजसो चिसो बढ्न थालेपछि आजभोलिको घाम प्यारो लाग्न थालेको मुड्केचुला गाउँपालिका–७ का स्थानीयवासी नवराज शाहीले बताए।

विज्ञापन

तल्लो डोल्पाभन्दा माथिल्लो डोल्पाका अधिकांश स्थानीयवासी बेँसी झरिरहेको काइके गाउँपालिका–७ का वडाध्यक्ष रामचन्द्र रोकायले बताए।

मङ्सिर, पुस र माघको तीन महीनाको जाडो छल्नका लागि जाजरकोट, नेपालगञ्ज, काठमाडौँ, सुर्खेत लगायतका जिल्लामा यहाँका स्थानीयवासी जाने गर्दछन्।

अहिले डोल्पाको जुफाल विमानस्थलमा बेसी झर्नेको ठूलो भीड रहेको छ। प्रत्येक वर्ष यही समयमा जाडो छल्न बेसी झर्ने सर्वसाधारणको भीड लाग्ने गरेको डोल्पाको जुफाल विमानस्थलले जनाएको छ।

कर्णालीवासीको जाडो छल्न झर्ने शहरहरुमध्ये काठमाडौँ प्रमुख रोजाइमा पर्ने गर्दछ। यतिखेर जाडो मौसम शुरु भएसँगै कामकाजबाट समेत फुर्सद पाइने भएकाले पनि व्यक्तिगत कामकाजदेखि लिएर राजनीतिक भेटघाट र सामान किनमेलका लागि पनि काठमाडौँ धेरै जाने गरेका हुन्। जाडो छल्न तराई झरेका डोल्पावासी फागुन महिना लागेपछि मात्रै घर फर्केर यार्सागुम्बा सङ्कलनतर्फ लाग्छन्।

हिँउदको मङ्सिर, पुस र माघमा चिसोका लागि फुर्सद निकालेर बेसी झर्ने उपल्लो डोल्पावासी कात्तिक महिनाभरि हिँउदेबालीका रुपमा रोपिने गहुँ, जौ, उवा लगायतका अन्नबालीहरु लगाइसक्ने गर्छन्।

केहीले हिँउदमा भारी हिमपात भई चिसोले घरबाहिर समेत निस्कन नसकिने भएकाले आगो ताप्नका लागि कात्तिकमा गुइँठा, दाउराको जोहो धेरै हुने गर्दछ।

चिसोमा घट्ट तथा मिलहरुमा जानसमेत समस्या हुने भएकाले खाद्यान्नको समस्या नहोस् भनेर कात्तिकमै धेरै परिमाणमा खाद्यान्न कुटानी–पिसानी किनमेल गर्दछन्।

सरकारी कार्यालय फुर्सदमा

जाडो सयममा धेरैजसो सर्वसाधारण जाडो छल्न तराई झर्ने भएकाले कार्यालयहरुमा कामकाजको चाप कम हुने र कर्मचारी पनि फुर्सद हुने गरेको छ। उपल्लो डोल्पामा रहेका ६ वटा प्रहरी चौकीसमेत सदरमुकाम दुनैमा आइसकेको प्रहरी नायब उपरीक्षक नारायण रञ्जितकारले बताए।

उपल्लो डोल्पाका तीन वटा स्थानीय तहको कामसमेत सदरमुकाम दुनैमा हुने गर्दछ। जिल्लाका अधिकांश सरकारी तथा गैरसरकारी कार्यालयहरु कर्मचारीविहीन हुने गर्दछन्।

कतिपय कार्यालयहरु सहयोगीको भरमा चल्दछन्। कर्मचारीहरु जाडो छल्न तथा घुमघामका लागि तराई झर्ने भएकाले यस समयमा कार्यालयहरु कर्मचारीविहीन हुने गरेका हुन्। कर्मचारी मात्रै नभई जनप्रतिनिधिहरुसमेत जाडो छल्ने बहानामा घुमघामका लागि तराईका जिल्लामा जाने गर्छन्।

उपल्लो क्षेत्रका तल्लो क्षेत्रमा, तल्लो क्षेत्रका तराईमा आएर स्थायी बसोबास गर्दा भूगोल जिल्लामै दुई क्षेत्रमा विभाजित छ। जिल्लाका उच्च भेगमा बसोबास गर्ने सर्वसाधारण तल्लो क्षेत्रमा भन्दा धेरै चिसो हुने भएकाले छ महिनाको अस्थायी बसोबासका लागि पशु चौपायसहित जाडो छल्न बेसी झर्ने गर्दछन्।

यतिखेर आर्थिक रुपमा मजबुद भएकाहरु भने काठमाडौँ, पोखरा, नेपालगञ्जलगायतका शहरमा जाने र आर्थिक अवस्था कमजोर सर्वसाधारण चिसो कम हुने ठाउँ खोज्दै तल्लो क्षेत्रमा झर्छन्।

यतिखेर उपल्लो क्षेत्रका मान्छेहरुले फुर्सदको समयको उपयोग गर्दै राडी, पाखी, झोला बनाएर बेच्ने र जिम्बुहरु अन्नबालीहरुसँग साटासाट गरेर आयआर्जन गर्ने गर्दछन्।

डोल्पामा दुई प्रकारको शैक्षिक सत्र लागू हुँदै आएको छ। उपल्लो डोल्पामा पर्ने डोल्पो बुद्ध, शे–फोक्सुण्डो, छार्काताङसोङ गाउँपालिकामा पर्ने सम्पूर्ण विद्यालयहरु चिसो समयमा बिदा हुन्छन्। उपल्लो डोल्पाका विद्यालय वैशाख मात्रै खुल्ने गर्दछन्।

तल्लो डोल्पाका सम्पूर्ण विद्यालय पुस पहिलो साताभित्र बन्द भएर फागुन पहिलो साता खुल्नेछन्।

कार्तिक १६, २०७६ मा प्रकाशित
प्रतिक्रिया दिनुहोस्