विश्वका ११ हजार वैज्ञानिकको चेतावनीः जलवायु परिवर्तन स्पष्ट रुपमा आपतकालको अवस्था

विश्वभरका झण्डै ११ हजार वैज्ञानिकको संलग्नतामा भएको अनुसन्धानले विश्वमा अहिले जलवायु आपतकालको अवस्था रहेको उल्लेख गरेको छ । जलवायु परिवर्तनको प्रभाव स्पष्ट र यसमा विवाद गर्नु पर्ने कुनै ठाउँ नै नरहेको वैज्ञानिकहरुले बताएका छन् ।

जलवायु परिवर्तनको प्रभाव विश्वभर परिरहेको र अहिले जलवायु आपतकालको अवस्था रहेको अनुसन्धान प्रतिवेदनमा उल्लेख गरिएको छ । पछिल्लो ४० वर्षको तथ्यांकलाई विश्लेषण गरिएको अनुसन्धानमा प्रतिवेदनमा विश्वभरका सरकारले जलवायु परिवर्तन सम्बन्धी संकट समाधानका लागि काम गर्न नसकेको उल्लेख गरिएको छ ।

विज्ञापन

तत्काल जलवायु परिवर्तन विरुद्ध एकीकृत ठोस प्रयास नभएमा अहिले मानव जातिले भोगिरहेको समस्या थप सघन भएर जाने अनुसन्धान प्रतिवेदनमा उल्लेख गरिएको छ ।

अनुसन्धानको क्रममा आफूहरुले देखेको जोखिम र चुनौतिका बारेमा जानकारी गराउनु वा चेतावनी दिनु आफूहरुको नैतिक जिम्मेवारी रहेको अनुसन्धानकर्ताले बताएका छन् । पछिल्लो स्याटेलाइट तथ्यांक अनुसार यो वर्षको अक्टोबर महिना इतिहासकै सबैभन्दा गर्मी या तातो अक्टोबर रहेको देखिएको छ ।

सतहको तापक्रमको तथ्यांक लिनु र त्यसको विश्वलेषण गर्नु मात्रै जलवायु परिवर्तनको प्रभाव तथा त्यसको जोखिमका बारेमा सही जानकारी पाउने उपयुक्त माध्यम नहुने अध्ययनमा उल्लेख गरिएको छ । त्यसले समग्र रुपमा आफूहरुले तथ्यांकको विश्लेषण गरेको अनुसन्धानकर्ताले बताएका छन् ।

आफूहरुले गरेको अनुसन्धानमा प्रयोग भएका तथ्यांकबाट पछिल्लो ४० वर्षमा जलवायु परिवर्तनका मुख्य सूचकहरु ग्राफिकल रुपमा देख्न सकिएको उनीहरुको भनाई छ । मानव तथा प्राणीको संख्यामा भएको वृद्धि, प्रतिव्यक्तिका लागि मासुको उत्पादन, विश्वव्यापी रुपमा रुखले ढाकिएका क्षेत्रमा आएको कमी तथा इन्धनको प्रयोगमा भएको वृद्धिसहितका सूचकहरुको अनुसन्धानमा प्रयोग भएको छ ।

समस्या आपतकालीन देखिए पनि केही क्षेत्रमा भने सकारात्मक काम भएको छ । विश्वव्यापी रुपमा नविकरणीय उर्जाको उत्पादनमा वृद्धि भएको छ । हरेक दशकमा हावा तथा सूर्यबाट उत्पादित उर्जाको प्रयोग ३७३ प्रतिशतले बढेको छ । तर सन् २०१८ मा प्रयोग भएको फोसिल फ्यूलको तुलनामा यो २८ गुणा कम हो ।

केही सकारात्मक प्रयास भए पनि अधिकांश सूचकहरु खराब दिशा तर्फ गएको र त्यसले जलवायु परिवर्तनलाई सहयोग गरिरहेको अनुसन्धानकर्ताले बताएका छन् ।

कार्तिक २०, २०७६ मा प्रकाशित
प्रतिक्रिया दिनुहोस्