अमेरिकी विदेशमन्त्री पोम्पेओले गरे रुस र चीनको तीव्र आलोचना

अमेरिकी विदेशमन्त्री माइक पोम्पेओले रुस तथा चीनको तीव्र आलोचना गरेका छन्।

जर्मनीको बर्लिनमा पुगेका विदेशमन्त्री पोम्पेओले रुस तथा चीनबाट तर्फबाट गम्भीर खतरा प्रस्तुत हुँदै आएको बताउँदै नेटोलाई सक्रिय हुन र चुनौतिहरुको सामना गर्न आग्रह गरेका छन् । नेटोले अहिलेका समस्या तथा चुनौतिहरुको सामना डटेर गर्नु पर्ने अमेरिकी विदेश मन्त्री पोम्पेओले बताएका छन् ।

विज्ञापन

चीनले आफ्नै नागरिकहरुलाई दबाउनका लागि प्रयोग गरिरहेको रणनीति अति भयानक रहेको पोम्पेओको आरोप छ । यस्तै रुसले छिमेकी देशहरुमा घुसपैठ तथा आक्रमण गरेको र आन्तरिक तथा बाह्य रुपमा प्रस्तुत हुँदै आएका सन्तोषहरुलाई वास्ता नगरेको पोम्पेओले बताएका छन् ।

फ्रान्सका राष्ट्रपति इम्यानुएल म्याक्रोँले हालै नेटोको अवस्था अहिले ‘ब्रेन डेड’ रहेको बताएका थिए । पोम्पेओले त्यसको व्यंग्यात्मक रुपमा खण्डन गरे ।

पोम्पेओले जर्मन चान्सलर एंगेला मर्केलसँगको भेटपछि पत्रकारसँग भने, ‘७० वर्षभन्दा बढी भयो…नेटो परिस्कृति र परिर्वतन हुनु पर्छ । यसले अहिलेको वास्तविकता र चुनौतिहरुको सामना गर्न सक्नु पर्छ ।’

उनले अघि भने, ‘नेटोलाई चाहिने स्रोतहरु उपलब्ध नगराई देशहरुले सुरक्षा पाउँछौँ भन्ने सोच्छन् र आफ्नो प्रतिबद्धता पूरा गर्दैनन् भने नेटो निश्क्रिय तथा अयोग्य हुनेछ ।’

हालै अमेरिकी राष्ट्रपति डोनाल्ड ट्रम्पले नेटोका युरोपेली सदस्य राष्ट्रहरुले नेटोको सैन्य खर्चका लागि आफ्नो तर्फबाट दिनु पर्ने खर्च नदिएको र आफ्नो सुरक्षाका लागि अमेरिकामाथि निर्भर भएको आरोप लगाउने गरेका छन् ।

नेटो स्थापनाको ७० वर्ष पूरा हुँदैछ र आउँदो डिसेम्बरमा लण्डनमा नेटो राष्ट्रहरुको सम्मेलन हुँदैछ । नेटो पश्चिमा राष्ट्रहरुको सैन्य संगठन हो ।

कार्तिक २३, २०७६ मा प्रकाशित
प्रतिक्रिया दिनुहोस्