ट्रम्पमाथि महाअभियोग लगाउने सम्बन्धी अनुसन्धान

ह्वाइट हाउसमा उच्च अधिकारीले दिए बयान, ट्रम्पमाथिको संकट थप सघन र गम्भीर

अमेरिकी राष्ट्रपति डोनाल्ड ट्रम्पमाथिको संकट थप सघन र गम्भीर बन्दै गएको छ । ट्रम्पमाथि महाअभियोग लगाउने सम्बन्धमा भइरहेको अनुसन्धानको क्रममा राष्ट्रपति कार्यालय ह्वाइट हाउसकै उच्च अधिकारीले बयान दिएका छन् ।

युक्रेनका लागि उच्च अमेरिकी अधिकारी रहेका लेफ्टिनेन्ट कर्णेल एलेक्जान्डर भिन्ड्म्यानसँग संसदीय समितिले सुनुवाई गरेको हो । लेफ्टिनेन्ट कर्णेल भिन्ड्म्यानले राष्ट्रपति ट्रम्पले युक्रेनका राष्ट्रपति भोलोडिमिर जेलेन्स्कीलाई गरेको टेलिफोन संवाद सुनेका थिए ।

सुनुवाईको क्रममा लेफ्टिनेन्ट कर्णेल भिन्ड्म्यानले राष्ट्रपति ट्रम्पले युक्रेनका राष्ट्रपतिसँग अनुचित राजनीतिक माग गरेको संसदीय समितिलाई बताएका छन् ।

सुनुवाईको क्रममा लेफ्टिनेन्ट कर्णेल भिन्ड्म्यानले भनेका छन्, ‘मैले सुनिरहेको कुरामा विश्वास लागेको थिएन ।’

राष्ट्रपति ट्रम्पले आफ्नो पद तथा शक्तिको दुरुपयोग गरी विदेशी शक्तिसँग आफ्ना सम्भावित प्रतिस्पर्धीको छवी धुमिल पार्न सहयोग माग गरेको सम्बन्धमा अहिले अनुसन्धान भइरहेको हो ।

राष्ट्रपति ट्रम्पमाथि युक्रेनका राष्ट्रपतिसँग सैन्य सहयोगको बदलामा पूर्व उपराष्ट्रपति जो बाइडेन तथा उनका छोरा हन्टर बाइडेनमाथि भ्रष्टाचार आरोपमा अनुसन्धान सुरु गर्न आग्रह गरेको आरोप छ ।

गएको जुलाई २५ मा गरेको टेलिफोन संवादको ट्रान्स्क्रिप्टमा पनि सो कुरा देखिएको छ । ट्रम्पले भने सबै आरोप अस्वीकार गर्दै आएका छन् ।

जो बाइडेन आउँदो वर्ष हुने राष्ट्रपति चुनावका लागि डेमोक्र्याटिक पार्टीका तर्फबाट उम्मेदवार बन्ने होडमा छन् र उनलाई सम्भावित उम्मेदवारको सूचिमा अघि रहेको मानिन्छ ।

सोही अनुसन्धानका क्रममा संसदीय समितिले मंगलबार लेफ्टिनेन्ट कर्णेल भिन्ड्म्यानसँग बयान लिएको हो ।

इराक युद्धमा समेत खटिएका भिन्ड्म्यान अमेरिकाको राष्ट्रिय सुरक्षा समिति (एनएससी) मा उच्च भूमिका निर्वाह गर्छन् । उनले मंगलबार आर्मी पोशाकमै संसदीय समितिमा बयान दिएका हुन् ।

ह्वाइट हाउसले गर्‍यो आलोचना

राष्ट्रपति कार्यालय ह्वाइट हाउसले संसदीय समितिमा बयान दिएका लेफ्टिनेन्ट कर्णेल भिन्ड्म्यानको तीव्र आलोचना गरेको छ ।

ट्रम्पले जेलेन्स्कीसँग गरेको टेलिफोन संवाद आफूले सुनेपछिको प्रतिक्रिया संसदीय समिति समक्ष भिन्ड्म्यानले बताए लगत्तै ह्वाइट हाउसको आधिकारिक ट्वीटर ह्याण्डलबाट उनको तीव्र आलोचना गर्दै ट्वीट गरिएको हो ।

भिन्ड्म्यानका पूर्व हाकिमको भनाईसहित ह्वाइट हाउसले ट्वीट गरेको हो।

भिन्ड्म्यानलाई रिपब्लिकन सांसदले गम्भीर आरोप लगाउँदै अमेरिकाप्रति उनको निष्ठामा शंका व्यक्ति गरे । उनीहरुले युक्रेनका अधिकारीले देशको रक्षा मन्त्री बन्न प्रस्ताव गरेको भनेर प्रश्न गरे ।

त्यसको जवाफमा भिन्ड्म्यानले भने, ‘हरेक पटक म यो कुरा खारेज गर्छु । म अमेरिकी हुँ ।’

उनले सुनुवाईको क्रममा ट्रम्पले जेलेन्स्कीसँग गरेको आग्रह अनुचित रहेको र त्यसले अमेरिकी युक्रेन नीतिलाई खराब दिशामा लैजाने संकेत देखिएकाले आफू चिन्तित भएको बताएका थिए ।

मंसिर ४, २०७६ मा प्रकाशित
प्रतिक्रिया दिनुहोस्