भारोत्तोलनमा नेपाललाई २ स्वर्णसहित कुल १६ पदक

पोखरा – १३औँ दक्षिण एसियाली खेलकुद (साग) अन्तर्गत नेपालले भारोत्तोलन प्रतियोगितामा हालसम्मकै उत्कृष्ट नतिजा प्रस्तुत गर्न सफल भएको छ।

स्पर्धामा कुल २० इभेन्ट अन्तर्गत नेपालले १६ इभेन्टमा सहभागिता जनाएको थियो। सहभागी सबै इभेन्टमा पदकसहित २ स्वर्ण नेपालले हात पार्न सफल भयो।

पोखरामा चार दिनसम्म चलेको प्रतियोगितामा नेपालले २ स्वर्ण, ३ रजत र ११ कास्यसहित कुल १६ पदक जित्न सफल भएको हो। शनिबारसम्म १४ पदक जितेकोमा अन्तिम दिन आइतबारको खेलबाट नेपालले १ रजत र १ कास्य थप गरेको हो।

प्रतियोगितामा नेपालसहित भारत, पाकिस्तान, श्रीलंका, बंगलादेश र भुटानको सहभागिता थियो। भारोत्तोलनमा भुटानको पहिलो सहभागिता हो। माल्दिभ्स सहभागी नै भएन। प्रतियोगितामा भारतले सर्वाधिक ९ स्वर्ण जित्दा पाकिस्तानले ६ तथा नेपाल, बंगलादेश र श्रीलंकाले समान २–२ स्वर्ण जिते। भुटानले १ मात्र कास्यमा चित्त बुझायो।

नेपालको तर्फबाट सञ्जु चौधरी (महिला ५९ केजी) र विकास थापा (पुरुष ८९ केजी) तौल समूहमा स्वर्ण जितेका हुन्। महिलातर्फ नेपालले ऐतिहासिक पहिलो स्वर्ण जितेको हो। अघिल्लो १२ औं संस्करणसम्म नेपालले भारोत्तोलनमा १ मात्र स्वर्णसहित २३ रजत र ८६ कास्य जितेको थियो। पहिलो स्वर्ण लिफ्टर कमलबहादुर अधिकारीको नाममा छ।

यसैबीच, आइतबारको खेलमा नेपालका लागि सागर भण्डारीले पुरुष १०९ केजी तौल समूहमा रजत पदक जित्न सफल भएका छन्। सो समूहमा पाकिस्तानी खेलाडी हन्जाला दस्तगीर वुटले स्वर्ण जिते। उनले स्न्याचतर्फ १५० र क्लीन एण्ड जर्कमा १८१ सहित कुल ३३१ किलो भार बहन गरेका हुन्।

सागरले राष्टिय रेकर्ड कायम गर्दै स्न्याचतर्फ १२० र क्लीन एण्ड जर्कमा १५५ गरी कुल २७५ तौल उठाएका हुन्। यसअघि सागको छनोट चरणमा आफ्नो नाममा तिनै विधाको रेकर्ड १३ औं सागमा उनले भंग गरेको जानकारी नेपाल भारोत्तोलन संघका प्रवक्ता रुकेश तण्डुकारले दिए।

प्रतियोगितामा बंगलादेशका खेलाडी मोहम्मद अब्दुल्लाह अई मुमिनले कास्यमा चित्त बुझाए। उनले स्न्याचतर्फ १२० र क्लीन एण्ड जर्कमा १४७ सहित कुल २६७ तौल उठाएका हुन्।

आइतबार नै भएको १०९ प्लस तौल समूहमा पाकिस्तानकै मोहम्मद नुह दस्तगीर वुटले स्वर्ण जिते। उनले स्न्याचमा १६५ र क्लीन एण्ड जर्कमा २१५ गरी कुल ३८० तौल उठाएका हुन्। सो तौल जारी संस्करणको सर्वाधिक भार बहन हो। १०९ किलो तथा १०९ प्लस किलो तौल समूहमा स्वर्ण जित्ने पाकिस्तान खेलाडी बुट सहोदर दाजुभाइ हुन्। १०९ प्लसमा श्रीलंकन खेलाडी डब्लु पी यु चरुकाले रजत जिते।

उनले स्न्याचमा १४० र क्लीन एण्ड जर्कमा १८० गरी कुल ३२० भार बहन गर्दा नेपालका लागि पुकार गुरुङले कुल २७५ तौल उठाए। उनले स्न्याचतर्फ १३२ र क्लीन एण्ड जर्कमा १४३ भार बहन गरेका हुन् ।

पुकारको स्न्याच विधामा राष्ट्रिय रेकर्ड हो। सो स्पर्धामा बंगलादेशका खेलाडी चौथो भए। खेलपछि प्रतिक्रिया दिँदै नेपाल भारोत्तोलन संघका अध्यक्ष तिलकबहादुर रावलले नेपालले हालसम्मकै उत्कृष्ट नतिजा ल्याएको सुनाउँदै खुसी व्यक्त गरे।

मंसिर २२, २०७६ मा प्रकाशित
प्रतिक्रिया दिनुहोस्