तस्बिरमा १३औ सागको शानदार समापन

आकाशमा आतिसबाजी, ड्रोनबाट बुद्धको आकृति, पशुपतिनाथ र नेपालको नक्सा

१३औ दक्षिण एशियाली खेलकूद प्रतियोगिता (साग) मंगलबार साँझ दशरथ रङ्गशालामा आयोजित समापन समारोहमा गरिएको आतिसबाजी र ड्रोनबाट आकाशका बनाइएको नेपालको नक्सा। तस्बिर-सुलभ श्रेष्ठ/देश सञ्‍चार

काठमाडौं- १३औ दक्षिण एशियाली खेलकूद प्रतियोगिता (साग) मंगलबार साँझ दशरथ रङ्गशालामा ऐतिहासिक र भव्य समारोहबीच समापन भएको छ ।

व्यवस्थित र भव्यरूपमा झिलिमिली पारेर सिँगारिएको रङ्गशालामा आयोजित विशेष समारोहमा हजारौँ दर्शक तथा खेलाडीको उपस्थितिमा आतसबाजी र विविध मौलिक सांस्कृतिक कार्यक्रमसहित साग समापन सम्पन्न भएको हो।

समापन समारोहको शुरुमा सहभागी सातै देशका खेलाडी, प्रशिक्षक र अधिकृतले आ–आफ्नो देशको झण्डा बोकेर मार्चपास गरेका थिए । समारोहमा प्रतियोगिताको मस्कट कृष्णसार र नेपाली संस्कृतिको अङ्ग लाखे नृत्य प्रदर्शन गरिएको थियो । प्यारापिटको दर्शकदीर्घामा नअटाएपछि हजारौँ उभिएरै समापन समारोहको अवलोकन गरेको देखिन्थ्यो।

यसका साथै आकाशमा आतिसबाजी गरिएको थियो भने १८ सय ड्रान मार्फत नेपालको नक्सा, राष्ट्रिय झण्डा, भगवान गौतम बुद्धको मुखाकृति, पशुपतिनाथ र १३औ सागको लोगो देखाइएको थियो।

समारोहमा प्रधानमन्त्री केपी शर्मा ओलीले भिडियो सन्देश दिँदै दक्षिण एशियाली मुलुकहरूको मिनी ओलम्पिक खेलकूद प्रतियोगिताका रूपमा रहेको सागले यस क्षेत्रका जनतामा एकता, मित्रता अभिवृद्धि गर्ने कार्यमा अत्यन्तै सफलता हासिल गरेको बताए।

प्रतियोगिताको सफल आयोजना र उत्कृष्ट खेलका निम्ति आयोजक र खेलाडीलाई बधाई ज्ञापन गर्दै प्रधानमन्त्री ओलीले प्रतियोगिताको समापनको सुखद सफलताका लागि योगदान गर्ने सरकार र खेलक्षेत्र सबैलाई धन्यवाद व्यक्त गरे।

उक्त प्रतियोगिताको राष्ट्रपति विद्यादेवी भण्डारीले मङ्सिर १५ गते उद्घाटन गरेकी थिइन्। छब्बीस खेल विधामा ३२० स्वर्ण, त्यतिकै सङ्ख्यामा रजत र ४८१ काश्य पदकका लागि काठमाडौँ, पोखरा र जनकपुरमा प्रतियोगिता सञ्चालन भएको थियो ।

समापन समारोहमा नेपाल ओलम्पिक कमिटीका अध्यक्ष जीवनराम श्रेष्ठले यस पटकको साग प्रतियोगितामार्फत दक्षिण एशियाली मुलुकका जनताबीच हार्दिकता र मित्रता कायम गर्न सफल भएको बताए।

राष्ट्रिय खेलकूद परिषद्का सदस्यसचिव रमेश सिलवालले १३औँ दक्षिण एशियाली खेलकूद प्रतियोगिता (साग) छोटो समयको तयारीमा ऐतिहासिक र भव्यरूपमा सम्पन्न सफल भएको बताए।

सागलाई सफल तुल्याउन करिब १८ हजार सुरक्षाकर्मी र ५०० स्वयंसेवक परिचालन गरिएको थियो । सन् १९८४ मा स्थापना भएको सागको १३औँ शृङ्खलासम्म आइपुग्दा नेपालले यसअघि दुई प्रतियोगिता सफलतापूर्वक सम्पन्न गरिसकेको थियो।

समापन समारोहमा उपप्रधानमन्त्री एवं रक्षामन्त्री ईश्वर पोखरेल, सञ्चारमन्त्री गोकुलप्रसाद बाँस्कोटा, अर्थमन्त्री डा युवराज खतिवडा, युवा तथा खेलकूदमन्त्री जगतबहादुर विश्वकर्मालगायतका विशिष्ट महानुभाव उपस्थित थिए।

सन् १९८४ मा पहिलोपटक नेपालबाट शुरु भएको सागको नेपालमा भएको यो तेस्रो संस्करण हो । दक्षिण एशियाली मुलुकबीचको यो प्रतियोगितालाई खेलकूद उत्सवका रूपमा लिने गरिन्छ।

सागमा नेपाल, भारत, बङ्गलादेश, पाकिस्तान, माल्दिभ्स, भूटान र श्रीलङ्काका खेलाडीले २६ खेल विधामा प्रतिस्पर्धा गरेका थिए। प्रतियोगितामा भारत पहिलो भयो भने नेपालले ५१ स्वर्णसहित दोस्रो स्थान कायम गर्न सफल भयो।

तस्बिरहरु-सुलभ श्रेष्ठ/देश सञ्‍चार

मंसिर २५, २०७६ मा प्रकाशित
प्रतिक्रिया दिनुहोस्