यातायातका साधन नहुँदा परीक्षणका लागि नमूना पठाउन असहज

झापा- कोरोना भाइरस कोभिड-१९ का शंकास्पद संक्रमित बिरामीको स्वाब प्रयोगशालामा पठाउन अन्यौल श्रृजना भएको छ।

विमान सेवा बन्द भएपछि स्वाब नमूना संकलन गरे पनि प्रयोगशालामा पठाउन गाह्रो हुने गरेको मेची अञ्चल अस्पताल भद्रपुरका मेडिकल सुपरिन्टेन्डेन्ट डा. पिताम्बर ठाकुरले बताए।

उनले केही दिन अघि धरानबाट एउटा एम्बुलेन्स काठमाडौं जाने भएकाले नमूना प्रयोगशाला पठाइएको बताए।

उनले भने, ‘अब नमूना पठाउँदा कसरी पठाउने भन्ने चिन्ता छ। सुन्दैछु, विराटनगरबाट दैनिक एउटा उडान हुने भएको छ रे नमूना संकलनकै लागि। छिटो निर्णय भए हुन्थ्यो।’

भारत तथा अन्य मुलुकबाट आएकाको गाउँ गाउँमा खोजी

भारत लगायत अन्य मुलुकमा रोजगारीका लागि गएका र केही समय यता घर आएकाको गाउँ/गाउँमा खोजी गर्ने काम तीब्र बनाइएको छ।

नेपाल प्रहरीका युनिट तथा स्थानीय तहका पदाधिकारी गाउँ/गाउँ पसेका छन्।

नेपाल प्रहरीले २ सय २६ जनाको सूचि तयार गरेर उनीहरुलाई आइसोलेसन्, होम क्वारेन्टाइन तथा सेल्फ क्वारेन्टाइनमा राखिसकेको छ।

जिल्ला प्रहरी कार्यालय झापाका प्रमुख प्रहरी उपरीक्षक कृष्ण कोइरालाले सामाजिक सञ्जाल फेसबुकमा सूचना जारी गर्दै विदेशबाट आएका मानिसहरुलाई प्रहरीको सम्पर्कमा आउन आग्रह गरेका छन्।

साथै स्थानीय तहद्वारा निर्मित टोल विकास संस्थाहरुलाई विदेशबाट आएकाहरुको खोजी गर्न अगुवाई गरिदिन उनले आग्रह गरेका छन्।

 

 

चैत्र १३, २०७६ मा प्रकाशित
प्रतिक्रिया दिनुहोस्