अन्नपूर्णको हिमपहिरोमा बेपत्ता थप एकजनाको शव फेला

कास्की – अन्नपूर्ण क्षेत्रमा पदयात्राका क्रममा गएको माघ ३ गते हिमपहिरोमा परी हराएका चार कोरियन र तीन नेपालीमध्ये थप एकजनाको शव सोमबार भेटिएको छ । थप एकजना कोरियाली नागरिकको शव पदमार्ग अन्तर्गत देउरालीमा फेला पारेको हो ।

अन्नपूर्ण गाँउपालिका–१ स्थित तीन हजार २०० मिटर उचाइमा अवस्थित हिङ्कुकेभ वरिपरि गएको हिमपहिरोमा हराएका मध्ये सोमबार भेटिएका कोरियाली नागरिकको शव अहिले पोखरा स्वास्थ्य विज्ञान प्रतिष्ठानमा ल्याइएको र काठमाडौँ पठाउने तयारी भएको नेपाली सेनाले जनाएको छ ।

यसअघि गएको शनिबार दुईजनाको शव घटनास्थल नजिक मोदी नदी किनारमा भेटिएको थियो । ती दुई शव भने काठमाडौँ ल्याएर त्रिवि शिक्षण अस्पतालको शव गृहमा राखिएको छ ।

सो पहिरोमा हराएका नेपाली पर्यटक पथप्रदर्शक सरोज परियारको गत चैतमा शव फेला परेको थियो भने अर्का एक नेपाली मेमबहादुर तामाङको शव गत वैशाख ११ गते फेला परेको थियो। हराइरहेका एक नेपाली र एक कोरियालीको शव खोजी भइरहेको पनि सेनाले जनाएको छ ।

कोरियाली नागरिकको शव लिन उनीहरुका आफन्त आएको भए पनि कोरोना भाइरसको संक्रमण फैलिन नदिनका लागि लागु गरिएको लकडाउन तथा उडान बन्द भएका कारण अन्यौल भएको छ । उनीहरुको अन्त्यष्टि यतै गर्ने वा स्वदेश नै लैजाने भन्ने बारे परिवारका सदस्यले निर्णय गर्ने कोरियाली दूतावासले जनाएको छ ।

आफ्नो देशका नागरिक हिमपहिरोमा बेपत्ता भएपछि उनीहरुको खोजी तथा उद्धारमा नेपालका लागि कोरियाली राजदूत पार्क यङ सिकले व्यक्तिगत रुपमै चासो देखाएका थिए ।

बैशाख १६, २०७७ मा प्रकाशित
प्रतिक्रिया दिनुहोस्