हुम्लाका क्वारेन्टाइनमा रहेकाहरुको स्वाब संकलन गरेर घर पठाइयाे

सिमकोट– हुम्लाको सदरमुकामसमेत रहेको सिमकोट गाउँपालिकाका क्वारेन्टाइनमा रहेका १९० जनाको स्वाब संकलन गरेर घर पठाइएको छ। क्वारेन्टाइन अवधि पूरा भएका सबैको आडिटी परिक्षण र स्वाब संकलन गरेर घर पठाइएको हो।

सिमकोट गाउँपालिकाका १४ वटा क्वारेन्टाइनमा रहेका २ सय ५६ जना र तीन जना सुरक्षाका लागि खटिएका गरी २ सय ५९ जना स्वाब संकलन तथा आरडीटी परीक्षण गरी घर फर्केका छन्।

त्यसमा १९० जनाको स्वाब संकलन गरिएको छ। स्वाब संकलनको रिपोर्ट नआउँदासम्म उनीहरु सबैलाई होम क्वारेन्टाइनमा बस्न सुझाव दिइएको छ। ७९ जनाको आरडिटी परिक्षण गर्दा रिपोर्ट नेगेटिभ आएपछि उनीहरु पनि घर फिर्ता भएका छन्।

नेपालगंजदेखि हवाईमार्गबाट उद्धार गरिएका उनीहरु सबै गत वैशाख २१ गतेबाट वडा अनुसार क्वारेन्टिनमा बस्दै आएका थिए। काठमाडौँ, सुर्खेत र नेपालगंजमा अलपत्र हुम्लाबासीको हवाईमार्गबाट उद्धार गरिएका थियो।

संकलन गरिएका स्वाबहरु पिसिआर परिक्षणका लागि आइतबार हवाई मार्गबाट सुर्खेत पठाउने तयारी भइरहेको छ। उनीको पिसिआर रिपोर्ट सोमबार मात्र आउने भएको छ।

जेष्ठ ३, २०७७ मा प्रकाशित
प्रतिक्रिया दिनुहोस्