कर्णालीमा थप तीन जनामा कोरोना पुष्टि

सिमकोट– कर्णाली प्रदेशमा थप तीन जनामा कोरोना संक्रमण पुष्टि भएको छ। शनिबार आएको रिपोर्ट अनुसार कर्णालीमा तीन जना संक्रमित थपिएका हुन्।

भारतबाट आएका तीनै जनाको यसअघि प्रदेश अस्पतालमा पिसिआर परिक्षण गर्दा रिपोर्टमा कोरोना पोजेटिभ देखिएपछि थप परिक्षणको लागि शुक्रबार नेपालगंज पठाइएको थियो।

सुर्खेतको बराहताल गाउँपालिकाका दुई जना र चौकुने गाउँपालिकाका एक जना गरी तीन जनामा कोरोना पोजेटिभ देखिएको प्रदेश अस्पतालका मेडिकल सुपरिटेन्डन्ट ( मेसु) डा. डम्बर खड्काले बताए।

उनीहरु तीन जनाको बिहीबार भारतबाट उद्धार गरी ल्याएर बबईमा आरडिटी परिक्षण गर्दा रिपोर्ट पोजेटिभ आएको थियो। बबईमा आठ सयभन्दा बढीको आरडिटी गर्दा १५ जनामा एन्टिबडी पोजेटिभ देखिएको थियो। उनीहरुमध्ये तीन जनाको पिसिआर रिपोर्ट पनि पोजेटिभ आएको हो।

यसअघि कर्णालीमा पहिलो पटक दैलखको आठबिस नगरपालिका वडा नम्बर १ का एक जनामा कोरोना देखिएको थियो। यससँग कर्णालीमा कोरोना संक्रमितको संख्या चार पुगेको छ।

कोरोना संक्रमण देखिएका चारै जनाको प्रदेश अस्पतालको कोरोना विशेष वार्डको आइसोलेशनमा राखि उपचार भइरहेको मेसु डा. खड्काले बताए।

जेष्ठ १०, २०७७ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू