जर्ज फ्लोइडको घाँटी घुँडाले थिच्ने पूर्व प्रहरी अधिकारी पक्राउ

जर्ज फ्लोइडको हत्याको विरोधमा अमेरिकाको मिनेशोटामा प्रदर्शनकारीले आगजनी समेत गरेका छन् ।

अश्वेत व्यक्ति जर्ज फ्लोइडको हिरासतमै निधन भएको घटनामा अमेरिकाको मिनियापोलसका एक पूर्व प्रहरी अधिकारी पक्राउ परेका छन् ।

पक्राउ परेका प्रहरी अधिकारीमाथि फ्लोइडको हत्या अभियोगमा दर्ता भएको अमेरिकी सञ्चारमाध्यमले जनाएका छन् । गएको सोमबार प्रहरीले फ्लोइडलाई पक्राउ गर्ने क्रममा बाटोमा लगाएर उनको घाँटीमा घुँडाले थिचेका थिए ।

फ्लोइडले ‘मलाई सास फेर्न गाह्रो भयो’ भन्दा पनि ती प्रहरी अधिकारीले घाँटीबाट घुँडा हटाएका थिएनन् । पछि हिरासतमै फ्लोइडको निधन भयो ।

प्रहरीले उनको घाँटी थिचेको भिडियो सामाजिक सञ्जालमार्फत सार्वजनिक भएपछि मिनेशोटाको मिनियापोलस प्रहरीले चार अधिकारीलाई बर्खास्त गरेको थियो ।

बर्खास्त गरिएका मध्ये फ्लोइडको घाँटी घुँडाले थिच्ने प्रहरी अधिकारी पक्राउ परेका हुन् । पक्राउ पर्ने पूर्व प्रहरी अधिकारी ४६ वर्षका डेरेक चुभन हुन् ।

फ्लोइडको हत्या भएको भन्दै मिनेशोटासहित अमेरिकाका विभिन्न स्थानमा प्रदर्शन भएका छन् । मिनियापोलसमा प्रदर्शनकारी र प्रहरीबिच झडप भएको छ । यस्तै लुटपाट पनि मच्चिएको छ ।

राष्ट्रपति कार्यालय ह्वाइट हाउस बाहिर पनि प्रदर्शन भयो । सोही कारण शुक्रबार ह्वाइट हाउस लकडाउन गरिएको थियो । मिनियापोलसको ट्वीन बजारमा कर्फ्यू लागु गरिएको छ ।

जेष्ठ १७, २०७७ मा प्रकाशित
प्रतिक्रिया दिनुहोस्