‘उद्योगमा ताला लागेको छ, कर कसरी तिर्ने ?’

नेपालगञ्ज – नेपालगञ्ज उद्योग बाणिज्य संघको अगुवाईमा नेपालगञ्जमा व्यवसायीले सरकारविरुद्ध प्रदर्शन गरेका छन् ।

सरकारले असार ७ गतेभित्र कर तिर्न भनेपछि त्यो समयमा कर तिर्न नसकिने भन्दै व्यवसायीले प्रदर्शन गरेका हुन्।

संघले बुधबार नै प्रमुख जिल्ला अधिकारीमार्फत अर्थमन्त्रीलाई ज्ञापनपत्र बुझाउँदै असार ७ गतेभित्र कर तिर्न नसकिने अवगत गराएको थियो । अर्थमन्त्रालयले जेठ २५ गतेभित्र कर तिर्नुपर्ने पुरानो निर्णय खारेज गरी कर तिर्ने समय असार ७ गते थप गरेको छ ।

सरकारको यो निर्णयको विरुद्धमा व्यवसायीले विभिन्न मागसहितको प्लेकार्ड बोकेर विरोध गरेका हुन्।

‘लकडाउन खोलेको तीन महिनापछि कर तिर्ने व्यवस्था गर, महामारीको बेलामा कर तिर्न बाध्य नपार, उद्योग व्यवसाय बन्द रहेको समयमा कर तिर्न असमर्थ छौं, उद्योग व्यवसाय बन्द, कसरी कर तिर्ने ?, आहत होइन, राहत चाहियो सरकार’ लगायत नारा लेखेको प्लेकार्ड बोकेर व्यवसायीले प्रदर्शन गरेका हुन् । बिहीबार बिहान नौदेखि दश बजेसम्म त्रिभुवनचोकस्थित नेपालगञ्ज उद्योग बाणिज्य संघको कार्यालय अगाडि प्रदर्शन भएको हो ।

संघका अध्यक्ष अब्दुल वाहिद मन्सुरीले उद्योगमा ताला लागेको अवस्थामा कसरी कर तिर्न सकिन्छ ? भन्ने प्रश्न गरे।

संघका महासचिव चिरञ्जीवी ओलीले लकडाउन खुलेको तीन महिनापछि कर तिर्ने व्यवस्था गर्न आग्रह गरे । संघले चरणवद्ध आन्दोलन चेतावनी दिएको छ । अर्को कार्यक्रम भने तय भइसकेको छैन ।

जेष्ठ २२, २०७७ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू