जलिरहेको क्यालिफोर्निया पुगेर ट्रम्पले भने–हेर्दै जानुस् अवस्था चिसिँदै जानेछ
सीमित समयका लागि भए पनि अमेरिकामा आउँदो नोभेम्बरमा हुने राष्ट्रपति चुनावमा जलवायु परिवर्तनको विषय चर्चाको केन्द्रमा आएको छ ।
कोरोना भाइरसको महामारी र रंगभेद विरोधी आन्दोलनका कारण जलवायु परिवर्तनको मुद्दा छायामा पर्दै आएको थियो ।
तर क्यालिफोर्निया, ओरिगन तथा वासिङ्गटन राज्यका विभिन्न क्षेत्रमा भीषण डढेलो लागेसँगै जलवायु परिवर्तनको मुद्दा अगाडि आएको हो । अगस्टको सुरुदेखि फैलिएको डढेलोका कारण झण्डै २० लाख हेक्टर क्षेत्र डढेको छ । अहिलेसम्म आगलागीका कारण कम्तीमा ३५ जनाको ज्यान गएको अमेरिकी अधिकारीले बताएका छन् ।
वैज्ञानिक तथा डेमोक्र्याट र संरक्षणकर्मीहरुले हरेक वर्ष भयानक बन्दै गएको डढेलोको समस्या जलवायु परिवर्तनका कारण रहेको र तत्काल उपयुक्त प्रयासको खाँचो रहेको बताउँदै आएका छन् । तर हप्तौँसँग डढेलोबारे मौन रहेका राष्ट्रपति डोनाल्ड ट्रम्पले भने डढेलोको कारण जलवायु परिवर्तन नरहेको बताएका छन् ।
भीषण डढेलोको चपेटामा परेको पश्चिमी तटीय राज्य क्यालिफोर्नियाको भ्रमणमा गएका ट्रम्पले जलवायु परिवर्तनलाई लिएर व्यक्त गरिएको चासो खारेज गरेका छन् । जलवायु परिवर्तन सम्बन्धी चासो खारेज गरेका ट्रम्पले क्यालिफोर्नियाका अधिकारीलाई ‘अब अवस्था चिसिन थाल्ने’ बताए ।
जलवायु परिवर्तनलाई शंकाका रुपमा हेर्ने र छल भन्दै आएका ट्रम्पले डढेलोको वास्तविक कारण कमजोर वन व्यवस्थापन रहेको दाबी गरे ।
तर डेमोक्र्याटिक उम्मेदवार जो बाइडेनले ट्रम्प ‘जलवायु अपराधी’ रहेको बताए ।
डेलवरमा भएको कार्यक्रममा पूर्व उपराष्ट्रपति समेत रहेका बाइडेनले थप चार वर्ष ट्रम्पलाई ह्वाइट हाउसको जिम्मा लगाएमा अमेरिकाले थप आगोका मुस्ला र बिस्तारित डढेलो देख्ने बताए ।
आफ्नो क्यालिफोर्निया भ्रमणको क्रममा ट्रम्पले भने डढेलोविरुद्धको युद्धमा सामेल अधिकारीहरुसँगको भेटमा कमजोर वन व्यवस्थापन नै कारक रहेको भन्दै आफ्नो पुरानो अडान दोहोर्याए ।
एक अधिकारीले विज्ञानलाई बेवास्ता गर्न नहुने भनि ट्रम्पलाई जलवायु परिवर्तनको मुद्दामा ध्यान दिन भनेका थिए । तर उनले त्यसलाई खारेज गरेर भने, ‘अवस्था सामान्य हुँदैछ, चिसिँदैछ, हेरिराख्नुस्…मलाई लाग्दैन कि विज्ञानले वास्तविकता जान्दछ ।’
ट्रम्प अधिकांश समय विज्ञानको विपक्षमा देखिँदै आएका छन् । उनले कोरोना भाइरसको महामारीलाई लिएर वैज्ञानिक तथा स्वास्थ्यविज्ञले भनेका कुरालाई लगातार अस्वीकार गर्दै आएका थिए र छन् कम्तीमा सार्वजनिक रुपमा । यस्तै उनले जलवायु परिवर्तन र डढेलोलाई लिएर पनि विज्ञानलाई अस्वीकार गर्दै आएका छन् ।
डेमोक्र्याटिक उम्मेदवार बाइडेनले भने जलवायु परिवर्तन अमेरिका र पूरै विश्वले सामना गरिरहेको सबैभन्दा गम्भीर समस्या रहेको बताएका छन् । विज्ञानलाई सुनेर सोही अनुसार तत्काल प्रयासको खाँचो रहेको र त्यस्तो गर्न नसकिए मानव सभ्यतामा गम्भीर असर पर्ने उनले बताएका छन् ।
अवस्था सामान्य अर्थात कोरोना भाइरसको महामारी र प्रहरी ज्यादती तथा रंगभेद विरोधी प्रदर्शन नचर्किएको भए अहिलेको अमेरिकी चुनावमा जलवायु परिवर्तन प्रमुख मुद्दा बन्ने थियो । तर ट्रम्पको पछिल्लो अभिव्यक्तिले तत्कालका लागि भए पनि यसलाई केन्द्रमा ल्याएको छ ।
तस्बिरहरु : गेट्टी इमेज
