लाप्चाबाट फर्केपछि हुम्लाका सिडिओ भन्छन् ‘अहिले केही बोल्दिनँ’

हुम्ला – नेपाली भूमि लाप्चामा चीनले भवन बनाएको विषयमा अनुगमन गर्न गएको प्रमुख जिल्ला अधिकारी चिरञ्जीवि गिरी नेतृत्वको टोली बिहीबार साँझ सदरमुकाम सिमकोट आइपुगेको छ। टोली लिमीको लाप्चा देखि हिल्सासम्म अनुगमन गरेर फिर्ता भएको हो ।

सीमा स्तम्भ र भवन बनेको स्थानको अनुगमन गरेर फिर्ता आएको प्रमुख जिल्ला अधिकारी गिरीले बताए। उनले स्थलगत अनुगमनबारे तयार पारिएको प्रतिवेदन मन्त्रालयमा पेश गर्ने बताए। उनले स्थलगत निरीक्षणबारे अहिले सञ्चार माध्यममा प्रतिक्रिया नदिने बताए।

टोलीका सदस्यलाई जथाभावी नबोल्न र प्रतिवेदन तयार गरी पेश गर्न मन्त्रालयको निर्देशन छ। प्रजिअ गिरीले अनुगमनको उपलब्धी हराएको भनिएको ११ नम्बर पिलर भेटिनु रहेकाे बताए।

गत असोज ३ गते नाम्खा गाउँपालिकाको वडा नम्बर ६ को लाप्चा क्षेत्रमा नेपाली भूभागमा चिनियाँ पक्षले एकतर्फी रुपमा भवन बनाएको कुरा बाहिर आएपछि अनुगमनका लागि टोली त्यसतर्फ लागेको थियो।

उक्त टोलीले अनुगमन प्रतिवेदन नबुझाउँदै सरकारले हुम्लामा चीनबाट नेपाली भूभाग अतिक्रमण नभएको बताइसकेको छ । गत बुधबार परराष्ट्रमन्त्री प्रदीप ज्ञवालीले हुम्लामा चीनले नेपाली भूमि अतिक्रमण गरेको हल्ला निराधार रहेको बताएका थिए।

असोज ९, २०७७ मा प्रकाशित
प्रतिक्रिया दिनुहोस्