प्रहरी समायोजन गर्न संघ सरकारसँग प्रदेश सरकारको आग्रह

जनकपुरधाम-प्रहरी समायोजन नहुँदा शान्ति सुरक्षा कायम गर्न समस्या भएको भन्दै संघसरकारलाई प्रहरी समायोजन गर्न प्रदेश सरकारले आग्रह गरेको छ।

प्रदेश प्रहरीको परिचालन, खटनपटन लगायतका कार्य प्रदेश सरकारलाई हस्तान्तरण गर्न प्रदेश सरकारले संघ सरकारसँग माग गरेको छ।

शुक्रवार प्रदेश २ का आन्तरिक मामिला तथा कानून मन्त्री ज्ञानेन्द्र कुमार यादवले प्रहरी समन्वय ऐन राष्ट्रपति विद्यादेवी भण्डारीसँग प्रमाणीकरण भईसकेको अवस्थामा प्रदेश प्रहरी परिचालन, खटनपटन लगायतका जिम्मा प्रदेशका आन्तरिक मामिला तथा कानून मन्त्रीलाई हस्तान्तरण गर्न गृह मन्त्री रामबहादुर थापा बादललाई पत्र लेखेका छन्।

नेपाल प्रहरी र प्रदेश प्रहरीले सम्पादन गर्ने कार्यको सञ्चालन, सुपरिवेक्षण र समन्वय सम्बन्धमा व्यवस्थागर्न बनेको ऐन २०७६ को दफा १२(१) मा प्रदेश प्रहरीको परिचालन र सुपरीवेक्षण प्रदेश सरकारको रहेको स्पष्ट व्यवस्था रहेकोले सोही ऐनको दफा १२ (२) मा प्रदेशको आन्तरिक शान्ति सुरक्षाको सम्बन्धमा प्रदेश प्रहरी प्रदेश सरकार प्रति उत्तरदायी हुने व्यवस्था रहेको भएतापनि हाल व्यवहारमा प्रदेश प्रहरी प्रदेश सरकार प्रति उत्तरदायी हुन नसकेकोले ऐन अनुसार प्रहरी परिचालन, खटनपटन लगायतको जिम्मा प्रदेश सरकारलाई दिन गृहमन्त्रालयमा पत्र पठाएको प्रदेश सरकारका प्रवक्ता समेत रहेमा आन्तरिक मामिला तथा कानून मन्त्री यादवले बताए।

प्रहरी समन्वय ऐन २०७६ साल माघ २८ गते नै राष्ट्रपतिबाट प्रमाणीकरण भईसकेको अवस्था छ।साथै प्रदेश नं.-२ मा प्रदेश प्रहरी ऐन २०७६ समेत कार्यान्वयनमा गईसकेकोले प्रदेश प्रहरीको परिचालन तथथा अन्य कामको जिम्मा प्रदेश सरकारलाई हस्तान्तरण गर्न प्रदेश सरकारले पत्र लेखेका छन्।

असोज ९, २०७७ मा प्रकाशित
प्रतिक्रिया दिनुहोस्