उत्तर प्रदेशमा फेरि अर्की दलित युवतीको सामूहिक बलात्कारपछि हत्या

सञ्चार संवाददाता
हाथरस सामूहिक बलात्कारपछि मारिएकी युवतीको परिवारको स्वीकृति बिना अन्तिम संस्कार गर्दै प्रहरी ।

भारतको उत्तर प्रदेशमा लगातार सामूहिक बलात्कारपछि हत्याका घटना भइरहेका छन् । हाथरसमा सामूहिक बलात्कारको घटनाले पूरै भारतभर प्रदर्शन भइरहेको छ । मानिसहरु आक्रोशित छन् ।

हाथरसको घटना सेलाउन नपाउँदै उत्तर प्रदेशकै बलरामपुरमा एक दलित युवतीको सामूहिक बलात्कारपछि हत्या भएको घटना सार्वजनिक भएको छ । युवतीका परिवारका सदस्यले बलरामपुर प्रहरी चौकीमा सामूहिक बलात्कारपछि हत्या भएको उजुरी दिएका छन् ।

प्रहरीले ट्वीट मार्फत सामूहिक बलात्कारपछि हत्या भएको उजुरी परेको जानकारी दिएको हो । प्रहरीले भनेको छ, ‘तहरीरमा २२ वर्षकी युवतीका परिवारका सदस्यले भनेका छन् कि ती युवती एक निजी फर्ममा काम गर्थिन् । मंगलबार कामबाट राति अबेरसम्म पनि फर्किइनन् ।

परिवारका सदस्यले फोन सम्पर्क गर्ने प्रयास गरे । तर भएन । केही समयपछि युवती रिक्सामा आइन्, उनको अवस्था निकै खराब थियो । परिवारले उनलाई तत्काल अस्पताल लैजाँदै थिए, बाटोमै मृत्यु भयो ।’

परिवारका सदस्यले उजुरीमा दुई युवाको नाम किटान गरेको प्रहरीले जनाएको छ । प्रहरीले दुवै अभियुक्तलाई पक्राउ गरेको छ । अनुसन्धान जारी रहेको र थप अभियुक्तहरुलाई पनि पक्राउ गरिने प्रहरीले जनाएको भारतीय सञ्चारमाध्यमले जनाएका छन् ।

हाथरस सामूहिक बलात्कारको घटना लगत्तै उत्तर प्रदेशकै बलरामपुरमा सामूहिक बलात्कारपछि हत्याको अर्को घटना सार्वजनिक भएपछि मुख्यमन्त्री योगी आदित्यनाथको राजीनामा माग थप चर्को बनेको छ ।

उत्तर प्रदेशका पूर्व मुख्यमन्त्री अखिलेश यादवले ट्वीट गरेर दुवै घटनाको निन्दा गर्दै लेखेका छन्, ‘भाजपा सरकारले बलरामपुरमा हाथरस जस्तो लापरवाही र ढाकछोप नगरोस्, अपराधिलाई कारवाही होस् ।’

यस्तै आम आदमी पार्टीका नेता सञ्जय सिंहले मुख्यमन्त्री आदित्यनाथको राजीनामा मागेका छन् ।

हाथरस सामूहिक बलात्कार

हाथरस सामूहिक बलात्कारपछि मारिएकी युवतीको परिवारको स्वीकृति बिना अन्तिम संस्कार भएकाे स्थान।

हाथरसमा सामूहिक बलात्कार पीडितको प्रहरीले परिवारको स्वीकृति बिना आधी रातमा अन्तिम संस्कार गरेको घटना सार्वजनिक भएपछि अहिले भारतभर विरोध चर्किएको छ । योगी आदित्यनाथ सरकारको राजीनामा माग भएको छ ।

राष्ट्रिय मानवअधिकार आयोग तथा राष्ट्रिय महिला आयोगले उत्तर प्रदेश प्रहरीलाई हाथरस सामूहिक बलात्कारको घटना र आधी रातमा अन्तिम संस्कार गरिएको बारे स्पष्ट जानकारी दिन नोटिस जारी गरेको छ ।

प्रहरीले जबरजस्ती मध्यरातमा पीडितको अन्तिम संस्कार गरेको घटनापछि विपक्षी दल तथा प्रहरीका पूर्व अधिकारीले उत्तर प्रदेश प्रहरीको आलोचना गरिरहेका छन् । प्रहरीले वक्तव्य जारी गरेर प्रहरीको रेखदेखमा परिवारका सदस्यले अन्तिम संस्कार गरेको दाबी गरेको छ ।

तर सेप्टेम्बर ३० को बिहान साढे दुई बजे सामूहिक बलात्कार पीडित युवतीको अन्तिम संस्कार भएको हो । त्यो बेला उपस्थित रहेका पत्रकार तथा सामाजिक सञ्जालमा सार्वजनिक भएका भिडियो तथा तस्बिरले भने फरक कुरा बताएका छन् ।

पत्रकारहरुले प्रहरीले जरबजस्ती अन्तिम संस्कार गरेको बताएका छन् । भिडियोमा प्रहरीले स्थानीयलाई गाली गरेको, कुटेको तथा पीडित परिवारलाई पनि गाली गरिरहेको सुनिन्छ ।


भिडियोमा पीडितकी आमाले छोरीको शव एक पटक घर लैजान प्रहरीसँग मागेको पनि देखिन्छ । तर पीडितको अन्तिम संस्कार घरपारिवारले चाहेको वा भनेको रीति रिवाज अनुसार नभएको पत्रकारहरुले बताएका छन् ।

उत्तर प्रदेशको हाथरसमा सामूहिक बलात्कारको शिकार भएकी २० वर्षकी दलित युवतीको गएको सोमबार राति दिल्लीको सफदरजंग अस्पतालमा उपचारको क्रममा निधन भएको थियो ।

पीडित युवतीलाई अलीगढ मुस्लिम युनिभर्सिटी मेडिकल कलेजबाट सफदरजंग अस्पताल लगिएको थियो । दुई हप्ताअघि देखि ती युवतीले मृत्युसँग संघर्ष गरिरहेकी थिइन् । आमा र दाइ–भाइसँग घाँस काट्न गएका बेला ती युवतीमाथि सेप्टेम्बर १४ मा सामूहिक बलात्कार भएको हो ।

आफूहरुले घाँस काटिरहेका बेला पछि रहेकी युवतीलाई तानेर स्थानीय युवाहरुले सामूहिक बलात्कार गरेको आरोप छ । बेहोस अवस्थामा युवतीलाई आमाले भेटेकी थिइन् । युवतीको जिब्रो काटिएको, ढाडको हड्डी भाँच्चिएको तथा शरीरको एक भागले काम नगर्ने अवस्थामा आफूहरुले फेला पारेको पीडितका भाइले बताएका छन् ।

घटनाका अभियुक्त चारजनालाई पक्राउ गरिएको हाथरस प्रहरीले जनाइसकेको छ । अभियुक्त पक्राउ परे पनि युवतीको शव प्रहरीले जबरजस्ती जलाएपछि उत्तर प्रदेशसहित भारतभर प्रदर्शन भइरहेको छ ।

असोज १५, २०७७ मा प्रकाशित
प्रतिक्रिया दिनुहोस्

सम्बन्धित वर्गका समाचारहरू