एकै व्यक्तिलाई दोहोरिएर कोरोना संक्रमण, दोस्रोपटकको संक्रमण झन गम्भीर

अमेरिकामा एक व्यक्तिलाई दोस्रोपटक कोरोना भाइरसको संक्रमण भएको छ । पहिलोपटक संक्रमण निको भएका व्यक्तिमा फेरि संक्रमण देखिएको हो ।

दोस्रोपटकको संक्रमण पहिलो भन्दा धेरै खतरनाक हुने डाक्टरले बताएका छन् । २५ वर्षका ती व्यक्तिको फोक्सोले शरीरलाई चाहिने जति अक्सिजन प्राप्त गर्न नसकेपछि अस्पताल भर्ना गरेर उपचार गरिएको अमेरिकी सञ्चारमाध्यमले जनाएका छन् ।

पुनः हुने संक्रमण अति दुर्लभ मानिन्छ । पुनः संक्रमण भएका ती व्यक्ति उपचारपछि संक्रमण मुक्त भएका छन् । तर लानसेट जर्नलमा प्रकाशित भएको अनुसन्धान प्रतिवेदनमा भाइरससँग लड्ने क्षमता कतिसम्म विकास हुन्छ भन्ने सम्बन्धी प्रश्न खडा गरिएको छ ।

नेभेडाका ती व्यक्तिमा स्वास्थ्य समस्या वा प्रतिरक्षा कमजोर रहेकाले कोभिड–१९ का लागि जोखिमयुक्त रहेको प्रतिवेदनमा उल्लेख छ ।

कहिले के भयो?

२५ मार्च–घाँटी खसखसाउने, खोकी लाग्ने, टाउको दुख्ने, वाकवाकी लाग्ने तथा झाडापाखाल लाग्ने सहितका लक्षण देखियो ।

१८ अप्रिल–पहिलो पटक कोरोना भाइरसको संक्रमण पुष्टि भयो।

२७ अप्रिल–प्रारम्भीक लक्षणहरु हराए ।

९ र २६ मे–दुई पटक कोरोना भाइरसको संक्रमण नरहेको रिपोर्ट आयो ।

२८ मे–फेरि लक्षण देखियो, योपटक ज्वरो आउने, टाउको दुख्ने, रिंगटा लाग्ने, खोकी लाग्ने, वाकवाकी लाग्ने र झाडापखाला लाग्ने भयो ।

५ जुन–दोस्रो पटक कोरोना संक्रमण पुष्टि भयो र उनको रगतमा अक्सिजनको मात्रा कम देखियो । सास फेर्न गाह्रो भयो ।

ती व्यक्तिमा दुईपटक नै कोरोना भाइरसको संक्रमण भएको वैज्ञानिकले बताएका छन् । पहिले संक्रमण भएको भाइरस सुसुप्त अवस्थामा बसेर पुनः सक्रिय भएको नभइ दोस्रोपटक पुनः संक्रमण भएको उनीहरुले बताएका छन् ।

यो कुराले पहिलोपटक संक्रमण निको हुँदैमा फेरि संक्रमण हुँदैन वा सो संक्रमणविरुद्ध प्रतिरक्षा विकास हुन्छ भन्ने नदेखिएको अनुसन्धानमा संलग्न युनिभर्सिटी अफ नेभेडाका डा. मार्क पान्डोरीले बताएका छन् ।

असोज २७, २०७७ मा प्रकाशित
प्रतिक्रिया दिनुहोस्