फ्रान्समा एक शिक्षकको घाँटी काटेर हत्या, इस्लामिक आतंकवाद रहेको राष्ट्रपतिको भनाइ

शिक्षकको हत्या भएको क्षेत्रमा प्रहरीहरु। तस्बिर : रोयटर्स

फ्रान्सको राजधानी पेरिस नजिकै एक शिक्षकको टाउको काटी हत्या भएको छ ।

आक्रमणकारीको प्रहरीको गोली लागेर मृत्यु भएको स्थानीय अधिकारीलाई उद्धृत गर्दै अन्तर्राष्ट्रिय सञ्चारमाध्यमले जनाएका छन् । घटना पूर्व हत्या भएका शिक्षकले आफ्ना विद्यार्धीलाई पैगम्बर मोहम्मदको विवादास्पद कार्टून देखाएका थिए ।

स्थानीय समय अनुसार शुक्रबार बेलुका पाँच बजेतिर घटना भएको हो । स्कूल नजिकै उनको हत्या भएको प्रहरीले जनाएको छ । सो घटनालाई आतंकवादी आक्रमणका रुपमा लिएर अनुसन्धान भइरहेको छ ।

राष्ट्रपति इम्यानुएल म्याक्रोँले घटनास्थलको निरीक्षण गरेका छन् । उनले सो घटना इस्लामिक आतंकवादी आक्रमण रहेको बताए ।

वाक स्वतन्त्रताबारे पढाएकै कारण शिक्षकको हत्या भएको म्याक्रोँको भनाई छ । शिक्षकको नाम खुलाइएको छैन ।

घटना लगत्तै प्रहरीले आक्रमणकारीलाई पक्राउ गर्न खोजेको थियो, तर भागेपछि गोली चलाउँदा उनको मृत्यु भएको हो । आक्रमणकारीका बारेमा पनि प्रहरीले केही खुलाएको छैन ।

सन् २०१५ मा स्थानीय व्यंग्य पत्रिका सार्ली एब्डोले प्रकाशित गरेको पैगम्बर मोहम्मदको विवादास्पद कार्टूनका कारण पत्रिकाको कार्यालयमा आतंकवादी आक्रमण भएको थियो । सो घटनाको सुनुवाई अहिले जारी छ ।

कात्तिक १, २०७७ मा प्रकाशित
प्रतिक्रिया दिनुहोस्