गुलावजंगको गुमेको पद फिर्ताका लागि ओली एक्लैको मुख्यमन्त्रीलाई लिखित निर्देशन दिएको खुलासा

काठमाडौँ – नेकपाका अध्यक्ष केपी शर्मा ओलीले मुख्यमन्त्री एवं संसदीय दलका नेता महेन्द्रबहादुर शाहीले गुलावजंग शाहीलाई प्रमुख सचेतकबाट निलम्बन गर्ने निर्णय फिर्ताका लागि आफू एक्लैले हस्ताक्षर गरी लिखित निर्देशन दिएको खुलासा भएको छ।

शाही पक्षले आव्हान गरेको शुक्रबार बिहान ११ बजे  संसदीय दलको बैठक बस्नु भन्दा अघि केहीबेर अघि दुई दिन अघि ओलीले शाहीलाई गुलाबजंग शाहको पद फिर्ताका लागि लिखितरुपमा दिएको निर्देशन सार्वजनिक भएको हो।

पत्रमा भनिएको छ,‘अनुशासित तबरले प्रमुख सचेतकको जिम्मेवारी सम्हालिरहनु भएको र मुख्यमन्त्रीबिरुद्ध अविश्वासको प्रस्तावमा हस्ताक्षर गर्न असहमत रहनु भएका नेपाल कम्युनिष्ट पार्टीका नेता, प्रदेशसभा दल कर्णालीका प्रमुख सचेतक श्री गुलावजंग शाहमाथि तपाईले गरेको कारवाही फिर्ता लिन र उहाँलाई पूर्ववत प्रमुख सचेतकको जिम्मेवारीमा स्थापित गर्न निर्देशित गर्दछु।’

अध्यक्ष प्रचण्डको सहमतिबिपरित ओलीले एक्लै शाहको निलम्बित पद फिर्ताका लागि लिखित निर्देशन दिएपछि यसलाई लिएर नेकपामा थप रडाको मच्चिने संकेत देखिएको छ।

यही कार्तिक चार गते ओली र प्रचण्डबीच छलफल सकिएलगत्तै प्रचण्डको सचिवालयले कर्णाली विवाद समाधानको जिम्मा प्रदेश कमिटी र संसदीय दललाई जिम्मा दिने ओलीसँग सहमति भएको दाबी गरेको थियो भने ओलीको सचिवालयले भने ओली र प्रचण्डबीच प्रमुख सचेतक शाहको पद र अविश्वासको प्रस्ताव फिर्ता गर्ने सहमति भएको दाबी गरेको थियो।

अध्यक्ष ओली र प्रचण्डबीच कर्णाली विवाद समाधानलाई लिएर मत बाझिएका बेला प्रचण्ड र अर्का वरिष्ठ नेता माधवकुमार नेपाल समूहको अग्रसरतामा शुक्रबार पूर्वनिर्धारित बैठक तय गरिएको छ।

मुख्यमन्त्री शाहीबिरुद्ध अघिल्लो महिना असोज २५ गते ओली पक्षका ८, नेपाल पक्षका ७ र पूर्वमाओवादी केन्द्र पृष्ठभूमिका ३ जना सांसदले अविश्वासको प्रस्ताव दर्ता गरेका थिए।

विवाद समाधानका लागि ओली र प्रचण्डले दुबै पक्षलाई काठमाडौँ बोलाएर एक्ला एक्लै र सामुहिक छलफल गरेपनि अन्तत उनीहरुले नै स्पष्ट सहमति गर्न नसक्दा कर्णालीको विवाद झन चर्किएको हो।

कात्तिक ७, २०७७ मा प्रकाशित
प्रतिक्रिया दिनुहोस्