पिएसजीको शानदार जित, मोइज किन र एमबाप्पले गरे गोल

साबिक विजेता पेरिस सेन्ट जर्मेन (पिएसजी) फ्रेन्च लिग वान फुटबल अन्तर्गत शनिबार राति भएको खेलमा शानदार जित दर्ता गरी शीर्ष स्थानमा उक्लिएको छ ।

घरेलु मैदानमा भएको खेलमा पिएसजीले डिजोनलाई ४-० ले पराजित गरेको हो । पिएसजीका लागि मोइज किनले दुई तथा केलियन एमबाप्पेले दुई गोल गरे ।

किनले पिएसजीबाट आफ्नो पहिलो र दोस्रो गोल शनिबार रातिकै खेलमा गरेका हुन् । उनले बाकेरको सहयोगमा तेस्रो मिनेटमा नै गोल गरी टिमलाई सुरुवाति अग्रता दिलाए । २३ औँ मिनेटमा नेइमारको सहयोगमा उनले व्यक्तिगत दोस्रो गोल गरेका हुन् ।

नेइमारले ८२ औँ मिनेटमा एमबाप्पेका लागि गोल गर्न सहयोग गरे । एमबाप्पेले सराबियाको सहयोगमा ८८ औँ मिनेटमा गोल गरेपछि पिएसजीले ४ ० को शानदार जित दर्ता गर्न सफल भएको हो ।

जितपछि शीर्ष स्थानमा पुगेको पिएसजीको ८ खेलबाट १८ अंक भएको छ । दोस्रो स्थानको लिलेको सात खेलबाट १७ अंक छ ।

लिग अन्तर्गत शनिबार राति नै भएको खेलमा लोरियन्ट मार्सेइलीसँग १ ० ले पराजित भएको छ ।

कात्तिक ९, २०७७ मा प्रकाशित
प्रतिक्रिया दिनुहोस्