प्रहरीले कारबाहीको तयारी थालेपछि भिटेनले ‘प्राइभेट’ गरे युट्युबको भिडियो

काठमाडौँ– प्रहरीले कारबाहीको तयारी गरेपछि र्‍यापर भिटेनले युट्युबमा राखेकाे आफ्नो भिडियो हेर्न नमिल्ने (प्राइभेट) बनाएका छन्। भिटेन म्यूजिक’ नामक युट्युब च्यानलबाट सार्वजनिक गरिएको उक्त भिडियो बिहीबार साँझबाट प्राइभेट गरिएको हो।

एक साताअघि सार्वजनिक गरेको र्‍यापको भिडियोमा आपत्तिजनक शब्द प्रयोग भएको भन्दै र्‍यापर भिटेन अर्थात समिर घिसिङलाई कारबाही गर्न प्रहरी प्रधान कार्यालयले साइबर ब्युरोलाई पत्र पठाएपछि युट्युबमा उक्त र्‍याप हेर्न नमिल्ने बनाइएको हो।

भिटेनले एक साताअघि सार्वजनिक गरेको ‘पारा’ शीर्षकको भिडियो नेपालको युट्युब ट्रेन्डिङको पहिलो थियो।

नेपाल प्रहरीका केन्द्रीय प्रवक्ता एसएसपी कुवेर कडायतले भिटेनले फेरि आपत्तिजनक शब्द प्रयोग गरी प्रहरीलाई समेत दुर्वचन बोलेर भिडियो सार्वजनिक गरेकाले कारबाही गर्न निर्देशन दिएको बताए।

साइबर ब्युरोका प्रमुख एसएसपी नबिन्द अर्यालले देशसञ्चारसँग कुरा गर्दै प्रहरी प्रधान कार्यालयको पत्र प्राप्त भइसकेकाले त्यसमा कारबाही गर्न प्रक्रिया सुरु गरिसकेको जानकारी दिए।

‘पत्र प्राप्त भएको छ। हामी त्यो भिडियो र अश्लील शब्दबारे छानबिन गर्दैछौँ,’  उनले भने।

गत वर्ष पनि उनको एउटा र्‍यापका कारण अपराध अनुसन्धान महाशाखाले उनलाई पक्राउ गरी कारबाही गर्न निर्देशन दिएको थियो।

कात्तिक १३, २०७७ मा प्रकाशित
प्रतिक्रिया दिनुहोस्