टिचिङ अस्पतालका मुटुरोग विशेषज्ञ तथा प्राध्यापक डा. झाको कोरोना संक्रमणले निधन

काठमाडौँ- कोरोना संक्रमणका कारण त्रिवि शिक्षण अस्पतालका मुटुरोग विशेषज्ञ तथा प्राध्यापक सुनील झाको निधन भएको छ। उनको सोमबार बिहान ९ बजे निधन भएको हो।
एक महिनाअघि डा. झालाई कोरोना पुष्टि भएको थियो।
कोरोना पुष्टि भएपछि सुरुमा उनलाई नर्भिक अस्पतालमा उपचार गरिएको थियो। स्वास्थ्य अवस्था गम्भीर भएपछि उनलाई त्रिवि शिक्षण अस्पतालकै आइसियुमा सारिएको थियो।
उनलाई निमोनिया भएको थियो। तीन सातादेखि उनी भेन्टिलेटरमै थिए।
उपचारमा संलग्न चिकित्सकहरुका अनुसार ‘मल्टीअर्गान’ फेल भएर डा. झाको मृत्यु भएको हो। ६२ वर्षीय झाले एक वर्षपछि सेवाबाट अवकाश लिँदै थिए।
मनमोहन कार्डियोथोरासिस एण्ड ट्रन्सप्लान्ट सेन्टरमा कार्यरत डा. झालाई सबै खालका उपचार गर्दा पनि सुधार हुन नसकेको चिकित्सकहरुले बताएका थिए।
मधुमेह र पार्किन्सन्स रोगका बिरामी डा. झालाई रेम्डेसिभिर र प्लाज्माथेरापीले पनि सुधार नआएको चिकित्सकहरुले जानकारी दिए।  झाको फोक्सोमा निमोनियाका दाग देखिइरहेको चिकित्सकहरुले बताएका थिए।
मंसिर १, २०७७ मा प्रकाशित
प्रतिक्रिया दिनुहोस्