अफ्रिकी देश नाइजरका दुई गाउँमा बिद्रोही आक्रमण, कम्तिमा ७९ जनाको मृत्यु

फाइल तस्बिर

अफ्रिकी देश नाइजरमा बिद्रोहीको आक्रमणमा कम्तिमा ७९ जनाको ज्यान गएको समाचार संस्था रोयटर्सले जनाएको छ।

इस्लामिक बिद्रोहीले ग्रामीण क्षेत्रमा गरेको आक्रमणमा सर्वसाधारणको ज्यान गएको हो।

ट्चोम्बान्गोउ गाउँमा भएको आक्रमणमा ४९ जनाको ज्यान गएको र १७ जना घाइते भएको खबरमा उल्लेख छ । यस्तै जारोउम्दारेयी गाउँमा भएको आक्रमणमा ३० जनाको ज्यान गएको हो।

दुवै गाउँ नाइजरको मालीसँगा जोडिएको पश्चिमी सीमा क्षेत्रमा पर्छन् । पछिल्लो समय इस्लामी बिद्रोही समूहले सो क्षेत्रमा हिंसात्मक आक्रमण गर्दै आएको छ ।

यसैबिच शनिबार फ्रान्सले मालीमा आफ्ना दुई सैनिक मारिएको बताएको थियो । त्यसअघि अल–कायदासँग सम्वद्ध समूहले गएको मंगलबार भएको आक्रमणमा तीन फ्रान्सेली सैनिकको हत्यामा आफ्नो संलग्नता रहेको बताएको थियो ।

फ्रान्सले पश्चिम अफ्रिकी क्षेत्रमा इस्लामिक बिद्रोही विरुद्धको आक्रमणमा नेतृत्व गरिरहेको छ । तर नाइजर र मालीसहितका देशमा आदिबासी हिंसा, मानव तथा लागुऔषध तस्करी तथा डाँकुबाट हुने हिंसा रोकिएको छैन ।

नाइजरका दुई गाउँमा भएको पछिल्लो आक्रमण त्यहाँको सरकारले फ्रान्सको आरएफआई समाचार संस्थालाई पुष्टि गरेको छ ।

पुस १९, २०७७ मा प्रकाशित
प्रतिक्रिया दिनुहोस्