हिमपातका कारण हिल्सा नाका बन्द

सिमकोट– हिमपातका कारण चीनसँगको सिमानाका हिल्सा क्षेत्र आवतजावत कार्य बन्द भएको छ। आइतबारबाट परेको बाक्लो हिमपातले नारा लेकमा सडक छोपिएपछि हिल्सा आउजाउ बन्द भएको हो।

शनिबारसम्म ६ हजार ६ सय मिटर अग्लो नारालेकबाट हिल्सा आउजाउ गर्न सकिने भएपनि हिमपातपछि बन्द भएको सीमा सुरक्षा चौकी (बिओपी) का इन्चार्ज सशस्त्र प्रहरी निरीक्षक सुरज केसीले जानकारी दिए। अब उक्त क्षेत्रमा हिउँले गर्दा सडक अवरुद्ध भएको उनले बताए। मानिस पैदल हिड्न पनि सक्ने अवस्था नरहेको उनले बताए।

हिल्सामा बिओपीमा २० जना सशस्त्र प्रहरी र अन्य होटेल कुरुवा बस्दै आएका छन्। उनले यसअघि चिसो माइनस नौ डिग्रीसम्म पुग्ने गरेकोमा अहिले त्यो बढेर माइनस १४ डिग्रीसम्म पुगेको बताए।

हिल्सामा रहँदै आएका सुरक्षाकर्मी र अन्य मानिस घरबाट बाहिर निस्कन सक्ने अवस्था रहेको छैन। टोलीलाई गस्ती गर्न पनि समस्या उत्पन्न भएको छ। सबै जना घरभित्र आगो तापेर बसिरहेको केसीले बताए।

हिमपात भइरहेका कारण सोलारले काम नगर्दा बत्ती पनि बन्द रहेको उनले जानकारी दिए।

पुस २१, २०७७ मा प्रकाशित
प्रतिक्रिया दिनुहोस्